BAUKAU, STLTIMORLESTE.com – Autoridade Suku Tirilolo, Postu Administrativu Baukau Vila, Munisipiu Baukau, implementa ona projetu Programa Nasional Dezenvolvimentu Suku (PNDS) tinan 2025.
Xefe Suku Tirilolo Elvino Freitas Belo esplika, projetu PNDS tinan nee implementa iha Suku Tirilolo kontinuasaun husi PNDS reguler da-7, neebe parte Suku inisia implementa reabilita estrada iha Aldeia Lutumutu no Betulale.
“Nee programa PNDS reguler da-7 nian primeiru ita implementa iha Lutumutu ohin kontinuasaun iha Aldeia Betulale nia distansia 350 meter iha lutumutu 175 meter, maibe komunidade kontribui fatuk rai mutin entaun too tiha 218 meter,” hateten Elvino ba jornalista sira iha Betulale Tirilolo, Tersa (09/09/2025).
Nia sublina, projetu reabilitasaun estrada iha Aldeia Lutumutu responde ba metru 350 no Aldeia Betulale tuir dezenhu PNDS responde ba metru 175, maibe komunidade sira apoiu material konstrusaun hanesan fatuk no rai mutin nunee atinji too metru 218.
Maibe projetu reabilita estrada iha Aldeia rua nee ho tipu cor semente, neebe sei fo asesu ba uma kain 1.200 neebe durante nee asesu kondisaun estrada aat.
“Projetu atu remata depende ba trabalhador sira, maibe hau rona husi sira katak sira tarjetu nee semana tolu ou semana rua,” katak Elvino.
Iha sorin seluk rezidente Belulale Julieta Belo sente kontente, tanba Autoridade Suku responde ona preokupasaun komunidade sira nian liu husi reabilita estrada neebe durante kondisaun aat ho orsamentu PNDS.
“PNDS mai agora ami nia estrada diak ona, maibe antes nee ami la kontente tanba udan nee bee naliun iha fatin fatin ami nia oan beoan sira ba eskola la diak, nee mak ami triste maibe agora diak ona, tanba estrada halo ona,” Julieta espresa.
Tuir rezidente Belulale nee katak, mezmu estrada nee reabilita ho semente tipu cor, maibe bele fasilita ona labarik estudante sira no ema boot nia movimentu lao ain husi uma ba eskola no fatin seluk tan.
Entretantu projetu reabilitasaun estrada nee ho valor orsamentu rihun US$ 38 neebe Autoridade Suku Tirilolo hetan husi PNDS iha tinan nee.
Jornalista: Tomas Reis
Editora: Carme Ximenes
