BAUKAU, STLTIMORLESTE.com – Autoridade Suku Uaiguia, Postu Administrativu Ossu, Munisipiu Vikeke, lamenta Ministeriu Edukasaun (ME) taka Eskola Ensinu Sekundaria Olokosa ninia Paralelu iha Suku Uaguia.
Xefe Suku Uaguia, Aquilis Ximenes Guterres, desizaun husi Ministeriu Edukasaun neebe iha, katak atu taka Eskola Ensinu Sekundaria Paralelu Uaguia neebe tutela ba eskola Ensinu Sekundaria Filial Olokasa Ossu, estudante nia inan aman la aseita nunee iha loron 13 Janeiru 2026 halo asaun pasifika iha edifisiu Eskola Ensinu Sekundaria Olokasa. No iha loron 14 Janeiru 2026 estudante sira nia inan aman nafatin organiza malu halo asaun hanesan, tanba la satisfas ho desizaun neebe iha.
“Atu taka oinsa nee mak hau la komprende liu, eskola taka nee nia impaktu saida la tuir sistema ga eskola mak taka nia aan rasik, se eskola mak taka nia aan rasik nee dehan estudante mak laiha, maibe agora alunus aumenta ba beibeik nee taka oinsa,” Aquilis Ximenes Guterres hateten ba STL liu husi telefone, Kuarta (14/01/2026).
Xefe Suku nee preokupa no la komprende Ministeriu Edukasaun nia objetivu taka eskola refere, tanba atu taka eskola ida bainhira estudante laiha, maibe durante nee estudante iha no dadaun total estudante besik 200 inklui estudante foun ba anu letivu 2026, maibe dezisaun Ministeriu Edukasaun kontrariu atu taka eskola.
Nia katak, ba asuntu taka eskola mak Ministeriu Edukasaun fihir katak, eskola refere laiha edifisiu, menus profesores no seluk tan nee responsabilidade Ministeriu nian atu kompleta hodi fasilita estudante sira laos atu taka eskola, tanba eskola refere harii husi inan aman, maibe hetan aseitasaun husi Ministeriu Edukasaun neebe ofisialmente lansa husi reprezentante Ministeriu Edukasaun husi nivel Munisipiu Vikeke tinan 3 liu ba.
“Eskola nee uluk sira mak mai loke tiha agora rona dehan sira mak taka fali, uluk hau ba Munisipiu sira dehan iha fali enkontru iha Olokasa ami sae ba sira dehan fali iha lei Edukasaun nian la permite atu loke, lei Edukasaun nee sira nia servisu, laos ami Autoridade nia servisu, ami Autoridade nia preokupasaun mak labarik sira eskola,” Aquilis komenta.
Xefe Suku Uaguia nee akresenta, kondisoens husi eskola refere saida deit mak seidauk kompleta priense regras no lei Edukasaun nian, Ministeriu mak iha responsabilidade atu kompleta, tanba eskola refere eziste atu fasilita estudante sira husi area Ossorua, Uaguia, Uabubu no Builo atu lao besik asesu prosesu aprendizajen, tanba durante tinan naruk lao ho distansia dook hafoin too eskola tuir prosesu aprendizajen.
Nia sublina, eskola refere eziste mos hatan ba preokupasaun eskola Sekundaria Filial Olokasa nian, tanba dutante eskola Sekundaria Olokosa menus sala aprendizajen.
“Eskola nee loke tinan 3 ona, tanba sala Olokasa nian nee la too entuan ami aumenta sala Klase Paralelu iha Uaguai para labarik sira atu lao besik iha Klase Paralelu ida nee,” Aquilis katak
Too notisia nee publika STL seidauk hetan komfirmasaun husi responsabiliza Eskola Ensinu Sekundaria Filial Olokasa no Diretor Servisu Munisipal Edukasaun Vikeke.
(tom)
