BAUKAU, STLTIMORLESTE.com – Autoridade Suku Vemasi, Postu Administrativu Vemasi, Munisipiu Baukau, la husik animal sira lao pasiar iha estrada publiku.
Xefe Suku Vemasi Carlos Freitas esplika, relasiona ho animal neebe komunidade sira hakiak iha Suku refere antes nee husik lao iha areadores suku nian, hanesan iha estrada publiku no estragus komunidade sira nia plantasaun, nunee liu husi Konselhu Suku kria regras interna hodi regulariza animal neebe komunidade sira hakiak neebe husik deit.
Nia sublina, husi animal neebe husik hodi movimentu livre iha areadores suku nian nee bele kria problema, tanba Suku Vemasi besik estrada publiku neebe iha movimentu ema ho transporte bele hetan asidente, bainhira animal korta iha movimentu transporte.
“Ami kaer ona bibi 20 lori ba Suku, nain ba fali foti, maibe ami mos fo atensaun se kontinua ami oho,” hateten Carlos ba STL iha Vemasi, Kuarta (23/10/2024).
Nia fundamenta, regras interna neebe Konselhu Suku kria regulariza komunidade sira husik animal livre nee, dahuluk fo samada atensaun, daruak aplika multa kada animal ida US$10.00 enkuantu datoluk nian mak nain ba animal kontinua husik livre Autoridade Suku tenke oho, tanba la obedese ba regras neebe Suku implementa.
Iha sorin seluk motorista Nicolao Ximenes apresia ho inisiativa Lider Komunitariu Suku Vemasi neebe kria ona regulamentu internal hodi la husik animal livre halo movimentu iha estrada publiku.
“Ideia nee diak, tanba bele evita asidente iha neeba. Durante hau halo viajem Dili Baukau ba mai la haree animal ida korta ita iha area Suku Vemasi nian,” nia hateten.
Husu Autoridade Suku no Postu sira neebe besik estrada nasional ligasaun Dili-Baukau, tenke implementa tuir regras neebe Lider Komunitariu Suku Abafala Vemasi aplika ona.
(EST 2)
