DILI, STLTIMORLESTE.com – Primeiru Ministru (PM), Kay Rala Xanana Gusmão, Sesta nee ba mini merkadu Perumnas, iha Suku Bairo Pite, Postu Administrativu Dom Aleixo, Munisipiu Dili, hodi sosa produtu lokal hanesan modo, batar, fehuk, lis, koto no seluk tan fahe ba komunidade sira.
Xefe Governu iha deit mini merkadu nee ba oras ida ho balu (17:40 too 18:52) hodi hasoru komunidade no negosiante sira iha mini merkadu Perumnas.
Dezde tun husi veikulu ka kareta Primeiru Ministru komprimenta kedan negosiante sira neebe halao negosiu iha mini merkadu nee, hodi sosa sira nia produtu hafoin fahe ba komunidade.
Ema numeru rua iha nasaun Timor Leste (TL) nee mos fo kortezia ba negosiante balu iha mini merkadu neebe nia hasoru bainhira vizita merkadu nee.
Mini merkadu neebe sai sentru ba vida ekonomia ba agrikultor lokal sira nee sai nakonu ho ema bainhira prezensa Xefe Governu iha neeba.
Entretantu populasaun sira kontente ho prezensa Primeiru Ministru nian, tanba fahe modo gratuita ba sira iha loron boot paskua.
Bainhira vizita mini merkadu nee, Xefe Governu hetan akompanhamentu husi membru governu balu no eskoltu husi Primeiru Ministru rasik.
(car)
