DILI, STLTIMORLESTE.com – Durante tinan barak ai-hale boot neebe hamriik metin iha area Taibesi sai ona hanesan sasin matan ba sidade Dili nia dezenvolvimentu, maibe iha loron hirak liu ba makina tesi ai nian neebe rona iha dadersan boot, duni tiha manu-fuik sira no halakon mahon ho memoria neebe naruk ona iha fatin neeba.
Desizaun governu nian hodi tesi ai-hun antigu sira nee hodi fo fatin ba dezenvolvimentu infraestrutura (estrada no sidade) hamosu sintimentu oioin iha komunidade nia leet entre simu progresu ka trsite tanba lakon identidade.
Tuir vizaun Governu nian, tesi ai sira nee nesesariu tebes. Aleinde hodi halo luan estrada hodi nunee bele hamenus kemacetan, ai-hun sira neebe tuan ona mos konsideira nuudar risku ba seguransa publiku, liu liu iha tempu anin boot no udan.
“Ita presiza sidade neebe moos no seguru, maski triste maibe dezemvomentu tenki lao ba oin,” dehan autoridade ida neebe lakohi fo sai ninia naran ba STL, iha Taibesi, Dili, Kuarta (25/02/2026).
Maski dezenvolvimentu nee ba interese publiku, parte balun husi komunidade lokal sira triste, tanba ai-hale nee iha valor istoriku no sai nuudar mahon ba sira durante tinan barak.
“Ami simu dezenvolvimentu, maibe ami mos lakon fatin mahon neebe antigu tebes. Ami hein katak Governu bele kuda fali ai-hun foun sira seluk neebe seguru liu iha fatin nee,” hatete reprezentante komunidade Taibesi ida ho naran, Manuel Soares.
Maibe ba ema barak, ai-hale nee iha kbbit “Lulik,” tuir krensa tradisional Timor nian, tesi ai hun boot hanesan nee laos buat kman, presiza serimonia no husu lisensa ba nain hodi labele hamosu dezastera iha futuru.
Aleinde kestaun kultura, tesi ai-hun sira nee mos hamosu prekolupasaun ba ambiente. Dili neebe konhesidu ho ninia loron manas neebe makas, agora lakon tan ninia ventilasaun natural.
“Bainhira aihun sira lakon, sidade sei sai hanesan manas liutan. Ita la bele deit harii tuda-matan (Beton), ita mos presiza kria espasu matak,”dehan Ativista Ambiental, Zeferino Amaral.
Nia dehan, Taibe sidade nian sei namaran liutan ho estrada neebe luan, maibe lakon uituan ninia is. Dezenvolvimentu mak presiza duni, maibe oinsa ema bele harii futuru ida neebe la haluha ninia abut no natureza.
(car)
