DILI, STLTIMORLESTE.com – Iha kruzamentu boot sidade Dili nian, ahi oan tranzitu neebe lo-loos sai polisia automatiku hodi regula movimentu, agora nonok no nakukun. Ba autoridade sira, karik nee kestaun tekniku deit, maibe ba povu neebe uza estrada loron-loron, ida nee mak “Ferias” ida neebe lori fali trauma no perigu ba sira nia moris.
Hahu husi dadersan too loraik, kruzamentu sira neebe lampu merah mate nakfilak sai fali fatin ba lei forte liu.”Karreta soke malu ho koroa, motorista sira buka dalan kloot hodi fura deit, no padestre sira liuliu labarik eskola no ferik-katuas tenke hein ho tauk iha estrada ninin.
“Lampu nee mate ona fulan barak, maibe haree hanesan governu la interese. Sira (autoridade) karik hein too ema mate foin hakfodak,” dehan katuas ida ho naran, Martinho Xavier neebe tula nia oan iha motor leten, ho oin neebe hirus ba STL, Kuarta (18/03/2026).
Iha parte ketak Observador Politika sira mos la nonok, sira kestiona tanba saida mak governu bele gasta milhaun ba milhaun ba projetu foun, maibe la konsege sosa deit “spare part” ka hadia kable lampu tranzitu nian.
“Bainhira lampu merah ferias, ida nee hatudu katak sistema manutensaun iha ita nia rai mos ferias hela. Nee falha boot iha prioridade governu nian ba seguransa publika,” dehan Observado Politika, Manuel Magno.
Ba Observador Politika sira, ida nee laos deit kestaun lampu, maibe kestaun konfiansa povu nian ba kbiit governu nian hodi jere sidade.
Tanba dadus la ofisial hatudu katak asidenti kiik hanesan motor soke malu husi kotuk aumenta iha kruzamentu sira neebe lampu mate. Povu sai vitima saugati deit ba birokrasi neebe lentu, ”Se governu labele garante buat simples hanesan lampu estrada nian, oinsa mak governu bele garante seguransa neebe boot liu,” hatete Observador Politika nee.
(car)
