DILI, STLTIMORLESTE.com – Iha odamatan boot Aeroportu Internasional Nicolau Lobato, lian hakoak no mata been sai hanesan kestaun neebe normal ona ba matan nia haree, bainhira kada semana joven nain atus ba atus kaer metin sira nia pasaporte ho esperansa boot, maibe ho fuan neebe todan, tanba sira laos atu ba pasiar, maibe sira ba buka moris hodi sosa futuru neebe sira sente susar atu hetan iha sira nia rain rasik.
Ba joven barak iha Timor Leste (TL), desizaun atu ba servisu iha rai liur hanesan Australia, Koreia Sul, Portugal no UK, laos tanba sira hakarak duni atu moris dok husi inan ho aman, maibe nee mak opsaun ida neebe sira iha hodi bele sai husi sakrefisiu moris nian.
“Hau tinan 7 buka servisu iha Dili laran, maibe rezultadu laiha. Hau labele hein tan, tanba hau nia inan ho aman mos idade ona,” dehan Delfin Soares, joven ida husi Munisipiu Covalima neebe hein hela aviaun atu semo ba rai liur, Sabadu nee.
Delfin reprezenta jerasaun ida neebe sente katak sira nia diploma deit la too hodi garante moris diak. Ba sira, rai liur mak fatin kmanek neebe hetan osan lalais hodi haruka mai familia sosa rai halo uma no haruka alin sira ba eskola.
Maski nakonu ho dezafiu, esperitu joven sira nian nafatin makas, sira ba ho mehi ida deit fila fali mai lori susesu, tanba ba Delfin ho joven rihun ba rihun seluk, distansia mak presu neebe sira tenke selu hodi bele haree sira nia familia hamnasa iha aban bainrua, sira nia kosar ben iha rai liur mak sai sasin katak, mehi atu moris dignu laiha fronteira.
Enkuantu Observador Politika, Jeremias da Silva hatete, politiku sira koalia deit kona-ba dezemvolvimentu iha jornal no televizaun laran, maibe jerasaun foun sira buka dalan seluk hodi bele hetan servisu. Governu hateten nee solusaun ba ekonomia, maibe realidade nee hanesan naok kakutak, tanba enjeneru, professor no agronomista sira barak agora dadauk servisu hela iha ema nia rai.
“Ita simu dolar milhaun ba milhaun hodi harii uma ho istilu foun iha foho, maibe ita lakon figura aman, figura oan no figura belun, familia sira fahe malu tanba osan, labarik sira boot laiha aman nia sorin, nee mak presu neebe ita selu,” hatete Jeremias.
Tanba nee nia husu governu no setor privadu presiza seriu liutan hodi kria kampu servisu neebe dignu no fo garantia ba joven sira, nunee iha futuru joven sira semo ba rai liur tanba hakarak buka esperansi, laos tanba obriga husi kbiit ekonomia.
(car)
