DILI, STLTIMORLESTE.com – Ministeriu Publiku (MP) iha alegasaun ba krimi Maus Tratus ba konjunje, solisita ba iha Tribunal Koletivu atu kondena arguidu ho inisial JMC, tanba baku beibeik lezada ho inisial LP hanesan feen.
Iha alegasaun loron Segunda (06/01/2025), Prokurador Napoliao da Silva mantein ho akuzasaun neebe iha, konsidera katak arguidu komete duni krimi neebe Ministeriu Publiku akuza ba, tanba arguidu konfesa imparsial ba faktus neebe iha.
Prokurador prosesu deklara, ho konfesaun arguidu nian reforsa tan ho akuzasaun neebe iha, MP la iha duvidas mantein ho akuzasaun neebe iha, hodi solisita ba iha Tribunal Koletivu atu kondena arguidu pena prizaun tinan 3 suspende ba tinan 5.
Enkuantu defeza arguidu nian Manuel Amaral deklara katak, arguidu konfesa imparsial ba faktus kolabora ho justisa, no foin primera vez mai iha Tribunal, tanba nee husu atu Tribunal kondena arguidu ho pena prizaun tinan 1 suspende ba tinan 3.
Rona tiha alegasaun sira nee, Tribunal adia ba loron seluk hodi rona desizaun.
Tuir akuzasaun neebe iha katak, iha loron 22 fulan Janeiru tinan 2023, iha Manleu, arguidu lori liman loos tuku kona iha lezada nia kanuruk dala haat, no lori tan liman tuku dala ida kona iha lezada nia matan fukun sorin loos.
Konsekuensia husi arguidu nia hahalok lezada hetan ulun kotuk nakles raan sulin bo bubu, bubu boot no sai metan iha matan fukun. No lezada ba halo tratamentu Saude iha Sentru Saude Komoro.
Katak arguidu halo agresaun fizika hasoru lezada dala lima ona, maibe foin primera vez lezada hatoo keixa ba Polisia.
Tanba nee, MP akuza arguidu komete krime Maus Tratus ba Konjuje ho forma Violensia Domestika previstu no punidu tuir artigu 154 husi Kodigu Penal no lei Violensia Domestika numeru 07/2010 loron 7 fulan Julhu.
Audensia julgamentu nee prezide husi Juiz Koletivu, Jumiaty Freitas, Jose Gonsalves, Jose Quintão, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Manuel Amaral.
(ter)
