DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial TGSX, tanba halo agresaun fiziku hasoru lezada ho inisial TX hanesan nia feen.
Iha audensia julgamentu laran, Tribunal deklara katak, Tribunal notifika arguidu maibe arguidu iha hela Inglatera, tanba nee Tribunal foti desizaun rona deit lezada nia deklarasaun.
Iha sala julgamentu laran lezada TX deklara katak, momentu neeba arguidu ho kondisaun lanu no hasai liafuan mal ba lezada ho nia familia sira, depois ida nee lezada dehan ba arguidu katak, sente lanu ba toba oin mos mak ba hasoru lezada nia famiia.
Maibe arguidu nafatin hasai liafuan mal, ho nunee lezada sente la diak lezada koalia hasoru arguidu, arguidu foti save motor tuku lezada nia ulun fatuk dala ida no tuku dala ida kona nia matan fukun kanek suku pontu tolu.
Lezada deklaran tan katak, depois de problema nee hotu arguidu sai kedas husi uma. no liu loron hira mak lezada nia familia bolu arguidu no dehan ba arguidu katak, bolu arguidu nia familia atu rezolve problema nee, maibe arguidu la bolu nia famiia.
Lazada deklara ba Trbunal katak, iha loron 25 Dezembru tinan 2020 lezada simu telefone ida husi lezada nia kolega mane ida, iha momentu neeba arguidu mos hetan lezada simu telefone ho nunee arguidu husu ba lezada se mak telefone, lezada hatan katak hau nia kolega mane husi Inglatera mak telefone mai fo boas festas, maibe arguidu lakohi rona lezada nia deklarasaun, arguidu diretamente tuku lezada nia ulun, maibe lezada la ba hatoo keixa.
Lezada mos informa katak, fulan-fulan arguidu haruka osan US$ 100 ba nia oan sira.
Rona tiha lezada, Tribunal husu ba Ministeru Publiku atu tama ba iha alegasaun. Iha alegasaun Prokurador husu ba Tribunal atu aplika pena prizasun tinan 3 suspende tinan 3 ba arguidu.
Entretantu Defeza husu ba Tribunal atu fo pena neebe adekuadu ba arguidu, tanba arguidu fulan fulan haruka osan ba nia oan sira.
Tuir faktus sufisiente katak, lezada TX ho arguidu iha relasaun hanesan feen ho laen dezde tinan 2011 sira seidauk kaben iha Igreja.
Iha loron 01 Janeiru 2021, iha oras 20h30 kalan, iha Fatuhada, Dili, momentu neeba arguidu lori liman los tuku ho makaas dala ida, nunee kona iha lezada nia matan fukun parte karuk rezulta kanek, moras no halo mos raan sai barak.
Motivu husi problema nee tanba lezada simu telefone husi nia kolega ida iha Inglatera, ho nune mak halo arguidu nervozu.
Laos foin primeira vez arguidu halo nia hahalok nee, maibe komesa sira hola malu, arguidu sempre halo agresaun ba lezada.
Iha tinan 2013, loron no fulan lezada haluha ona, bainhira lezada ho arguidu istori malu, arguidu sempre trata aat lezada no oan sira mos.
Iha tinan 2019 loron no fulan lezada haluha ona, arguidu lori liman los hodi tuku dala ida iha lezada nia rentos kauza bubu no mean, maibe lezada la ba halo tratamentu iha klinika.
Konsekuensia husi arguidu nia hahalok nee mak halo lezada sente moras iha matan fukun, rentos, ameasa tan leslzada, nunee halo tauk, halo mos lezada triste tanba hetan beibeik agresaun husi nia laen.
Arguidu halo ho forma livre, deliberada no konsiente katak, sempre halo agresaun fisika ba lezada, bele halo moras no bele halo lezada hanoin barak, hanesan meus ou instrumentu ida neebe maka aptu no adekuadu.
Arguidu mos hatene hela katak, nia hahalok nee tuir lei penal bandu.
Tanba nee arguidu TGSX hanesan autor material ba pratika krime ida Maus Tratus tuir artigu 154 ho Lei nu. 7/2010.
Audensia julgamentu nee prezide husi Juiz Koletivu Argentinho Nunes, Ivan Suritay, Zulmira Auxiladora, Ministeriu Publiku reprezenta husi Prokurador nain ida, arguidu hetan asistensia legal husi Defensor Publiku nain ida.
(ter)
