DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial PM hanesan oknum Polisia Nasional Timor Leste (PNTL), neebe halo agresaun hasoru lezada (feen) ho inisial MF.
Iha sala julgamentu laran iha loron Segunda, Juiz Prosesu Ana Paula lee sai akuzasaun neebe mai husi Ministeriu Publiku katak, hatan ba akuzasaun neebe iha arguidu konfesa imparsial ba faktus, arguidu deklara halo duni agresaun hasoru lezada, no depois mosu problema arguidu no lezada la iha tan relasaun ona, no agora lezada hela iha neebe mos arguidu la hatene. Arguidu rekonhese iha feen boot no oan nain 6.
Arguidu mos arepende ba hahalok nee, no promete sei la halo tan hahalok nee iha futuru.
Iha sala julgamentu laran, Tribunal labele rona lezada, tanba Tribunal notifika lezada maibe Xefe Aldeia sira la konhese lezada, tanba lezada nia naran la rejista iha livru aldeia nian.
Ho ida nee, Tribunal husu ba iha Prokurador atu tama ba iha alegasaun. Liu husi alegasaun Prokurador Hernani Rangel deklara katak, arguidu konfesa lo-loos ba faktus neebe iha, arguidu mos deklara arepende ba hahalok nee, ida nee sai hanesan sirkunstansia ida.
Haree arguidu foin primeira vez mai iha Tribunal, Prokurador solisita ba iha Tribunal Singular atu kondena arguidu ho pena multa. Enkuantu defeza Joana Cristina mos aseita ho pedidu Ministeriu Publiku nian husu atu Tribunal aplika pena multa ba arguidu.
Rona tiha husi alegasaun, Juiz Prosesu lee sai desizaun katak, arguidu konfesa ba faktus neebe iha hodi prosesu lao ho lais. Ba prosesu nee lezada la mai. Tribunal mos tetu arguidu la iha atensendensia kriminal, no foin primera vez mai iha Tribunal, ho nunee Tribunal deside aplika pena multa $ 90 ba arguidu. Tribunal mos fo hanoin, arguidu la kumpri pena multa nee, arguidu sei kumpri pena alternativa durante loron 60 iha Prizaun.
Audensia julgamentu nee prezide husi Juiz Singular Ana Paula, Ministeriu Publiku reprezenta husi Prourador Hernani Rangel, arguidu hetan asistensia legal husi Defensora Publika Joana Cristina.
(ter)
