DILI, STLTIMORLESTE.com – Ministeriu Publiku (MP) iha alegasaun ba krimi Violensia Domestika, solisita ba iha Tribunal Singular atu aplika pena multa ba arguidu ho inisial EPG hanesan oknum FALINTIL – Forsa Defeza Timor Leste (F-FDTL).
Iha alegasaun loron Segunda nee, Prokurador Hernani Rangel deklara katak, arguidu konfesa ba faktus halo duni agresaun hasoru lezada ho inisial B hanesan feen.
Tanba nee, Ministeriu Publiku mantein ho akuzasaun neebe iha, solisita ba iha Tribunal Singular atu aplika pena multa ba iha arguidu.
Enkuantu defeza arguidu nian deklara katak, arguidu konfesa ba faktus tanba nee husu Tribunal atu aplika pena justu ba arguidu.
Rona tiha alegasaun, Tribunal adia ba loron seluk hodi roba desizaun.
Tuir akuzasaun neebe iha katak, arguidu EPG lezada B moris hamutuk iha uma ida nuudar feen ho laen iha tinan 2021.
Durante forma sira nia uma kain, lezada ho arguidu kous oan rua, feto ida ho mane ida, ekonomikamente lezada ho arguidu depende ba malu.
Iha loron 29 fulan Agostu tinan 2023, oras tuku 15:45 OTL, iha uma Hera, lezada ho arguidu nia oan feto ho idade tinan ida mak monu, tanba nee mak halo arguidu hirus hodi halo agresaun fizika hasoru lezada.
Momentu nee arguidu lori ain hodi tebe dala ida ho makaas ba lezada nian hirus matan, halo lezada sente moras.
Katak bainhira too fali kalan oras tuku 23:20 OTL, lezada foti osan ho montante rihun rua atus neen (US$ 2.600) halai sai husi uma Hera, hodi ba kedas nia inan aman sira iha Manleuana.
Iha fali loron 30 fulan Agostu tinan 2023, oras tuku 12:00 OTL, lezada fila fali ba sira nia uma iha Hera, ho objetivu atu lori sira nia oan rua ba hotu iha Manleuana.
Wainhira lezada seidauk kous sira nia oan, arguidu ba hodi hit sae lezada nia buluza hodi buka osan, maibe lezada hatete ba arguidu katak osan hau la lori ida, ho ida nee mak arguidu nervozu hodi lori liman tuku kedas lezada nia tilun hun parte loos, rezulta lezada monu kedas ba iha rai.
Konsekuensia husi agresaun arguidu nian, rezulta lezada nia tilun los moras no been sai durante semana ida, lezada mos ba halo tratamentu saude iha Pradet.
Arguidu halo ho forma livre, ho depropozitu halo agresaun fizika hasoru lezada nuudar arguidu nia kaben, katak lori liman ho ain hodi halo agresaun hasoru lezada, konsidera hanesan meiu ida hodi halo moras ba lezada nia isin, tuir buat neebe mak hakerek ona iha leten.
Hahalok arguidu nian ho konsiensia rasik no hatene katak, hahalok nee lei bandu, maibe arguidu halo nafatin.
Ho hahalok sira nee, konsidera arguidu hanesan autor material ho forma konsumadu, pratika krimi rua, Violensia Domestika, tuir lei numeru 7/2010, ho forma ofensas integridade fizika simples, tuir artigu 145 husi Kodigu Penal.
Audensia julgamentu nee prezide husi Juiz Singular Ersilia de Jesus, Ministeriu Publiku reprezenta husi Prokurador Hernani Rangel, arguidu hetan asistensia legal husi Pessoa Idonia.
(ter)
