DILI, STLTIMORLESTE.com – Relasiona ho kazu suspeitu baku feen too bebe mate iha kabun laran neebe akontese iha Munisipiu Likisa, husi parte Governu liu husi Sekretaria Estadu ba Igualdade (SEI) kontinua halo sosializasaun ba komunidade.
Relasiona kazu neebe akontese iha Munisipiu Likisa, suspeitu baku feen too bebe mate iha kabun laran, oinsa Sekretaria Estadu ba Igualdade nia haree ba assuntu nee? Hatan ba kestaun nee Sekretaria Estadu ba Igualdade, Elvina Sousa Carvalho ba jornalista sira iha Hotel Timor, Segunda nee (01/12/2025) hatete, nafatin halo sosializasaun ba iha komunidade sira.
“Servisu lao nafatin, servisu Sekretariu Estadu ba Igualdade ho parseiru sira lao nafatin, ami halo sosializasaun ba iha sosiedade oinsa bele hatene sira nia direitu nomos sira nia dever, husu ba ema hotu atu kontribui ba prevensaun violensia bazeia ba jeneru,” dehan Elvina.
Sekretaria Estadu ba Igualdade hatete, oras nee daudaun iha rede referal no sistema neebe mak estabelese ona atu fo resposta ba kazu neebe mak mosu iha sosiedade nia leet.
“Ita iha rede referal, ita iha sistema estabelesidu atu fo resposta ba iha violensia bazeia ba jeneru nomos kazu sira neebe mak mosu, no ita iha sistema estabelisidu neebe mak forte tebes atu bele fo asistensia, tanba ita iha planu asaun nasional violensia bazeia ba jeneru iha Timor Leste, tanba nee mak iha pilar tolu importante tebes prevensaun, provizaun servisu nomos asesu ba justisa, neebe tolu nee importante tebes,” dehan nia.
Elvina hatete, durante nee Governu liu husi SEI implementa hela no sistema estabelesidu atu bele resposta, tanba nee husu nafatin ema hotu hotu iha Timor laran tomak atu kolabora ba iha prevensaun violensia bazeia ba jeneru.
Aleinde nee Polísia Nasional Timor Leste (PNTL) Munisipiu Likisa, Postu Administrativu Bazartete detein ona autor VAC neebe oho Xefe Aldeia, Metir Miguel dos Santos (mate fatin) no agresaun fízika hasoru feen Agusta de Deus hodi rezulta bebe mate iha kabun laran.
Iha loron Sabadu, 29 Novembru 2025, por volta oras 06h30, akontese kazu Omisidiu Agravadu no Ofensas Integridade Fízika Agravadu iha Aldeia Metir, Suku Fatumasi, Postu Bazartete, Munisípiu Likisa, rezulta Xefe Aldeia mate fatin no feen rasik kanek grave, rezulta bebe mate iha kabun laran.
Tuir informasaun neebe publika husi media PNTL hatete, antes oho Xefe Aldeia, suspeitu halo uluk agresaun fízika hasoru nia feen, Agusta de Deus ho idade 28, neebe iha kondisaun gravida. Vítima feto nee lori ba Hospital Nasional GuidoValadares, agora halo hela tratamentu iha ICU, ho informasaun mediku dehan katak bebe iha inan nia isin mate ona.
Husi akontesimentu nee, Ekipa Konjunta PNTL Munisípiu Likisa no F-FDTL destakadu Likisa buka tuir suspeitu refere. Iha Domingu, tuku 13h30, ekipa lideradu husi Xefe Seksaun Rezerva Intervensaun Rapida Inspetor, Xefe Ernesto Maia no Xefe SIK Munisípiu Likisa, Inspetor Asistente Polísia Amarojo Joaquim dos Santos ho Ekipa hamutuk ho juventude husi suku Fahilebo no Fatumasi, konsege kaer suspeitu iha ailaran baliza Suku Fahilebo no Fatumasi.
Jornalista: Emerenciana Pinto
Editor: Xisto Mendonça
