DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial MC hanesan laen, tanba komete krime hasoru lezada hanesan feen ho inisial FJ.
Iha indisus katak, iha loron 26 fulan Setembru iha Santa Kruz, arguidu lori ain tebe lezada, no lori liman basa iha lezada nia hasan.
Motivu husi problema nee tanba kos nain husu osan kos nian ba lezada, maibe lezada dehan husu ba iha arguidu no kos nain husu ba iha arguidu depois arguidu fila ba lezada diskuti malu, hodi too ikus hamosu problema.
Konsekuensia husi arguidu nia hahalok nee halo lezada sente moras hodi ba hatoo keixa.
Tanba nee Ministeriu Publiku akuza arguidu MC hanesan autor material ba pratika krime Violensia Domestika ho forma ofensa integridade Fisika Simples.
Hatan ba akuzasaun nee arguidu deklara katak, faktus neebe konsta iha akuzasaun loos hotu. Arguidu rekonhese problema mosu tanba osan kos nian.
Arguidu deklara, agora sira kontinua hela kos, maibe kona-ba osan atu selu kos nian la iha tan problema ona.
Arguidu arepende tebes nia hahalok nee, no promete sei la halo tan hahalok nee iha futuru.
Aleinde nee lezada deklara katak, agora lezada mak kaer osan hodi selu kos no husi problema nee mosu too mai agora la iha tan problema ona.
Rona tiha arguidu no lezada Tribunal husu atu tama ba iha faze alegasaun.
Liu husi alegasaun final, Ministeriu Publiku haree katak, faktus neebe konsta iha akuzasaun loos hotu. Tanba nee atu halo prevensaun iha futuru, MP husu Tribunal atu aplika pena prizaun tinan 2 suspende ba tinan 3.
Enkuantu husi parte defeza nian husu Tribunal atu aplika pena multa.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz estajiada nain ida, Ministeriu Publiku reprezenta husi Prokuradora Bemvinda do Rozario, arguidu hetan asistensia legal husi Defensor Publiku Manuel Sarmento.
(ter)
