DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial AS hanesan laen, tanba komete krimi hasoru lezada ho inisial AC hanesan feen.
Tuir akuzasaun neebe iha katak, iha loron 26 fulan Julhu tinan 2024, oras 08:00 OTL, arguidu halo agresaun fizika hasoru lezada iha sira nia uma Aldeia Toko Baru, Bidau Santa Ana, Dili.
Motivu husi mosu problema, tanba lezada ho arguidu diskuti malu kona-ba sira nia telemovel neebe lezada lori ba halo penhor tiha iha loja naran Fabel iha loron 07 fulan Julhu tinan 2024, ho valor osan US$ 20 ho funan osan US$ 4.
Momentu neeba arguidu haruka lezada atu ba foti telemovel nee iha loja Fabei, maibe la konsege ba foti tanba osan seidauk iha, iha loron nee duni lezada husu osan ho valor US$ 24 ho objetivu atu ba foti fali telemovel nee, maibe arguidu responde ba lezada katak, bosok ten, horibain hira fo tiha ona osan US$ 4, nusa mak sei fo tan osan dolar US$ 24, hafoin lezada mos kontinua diskuti malu ho arguidu.
Momentu iha diskusaun nee, arguidu lori nia liman tuku dala haat ba lezada nia ulun sorin parte karuk hodi rezulta bubu, hafoin sira nia oan mane ho naran C mak ba sori tiha arguidu ho lezada no arguidu mos ba tiha nia inan aman sira nia uma.
Katak wainhira arguidu ba nia inan aman sira nia uma, lezada mos tuir arguidu ba iha nia banin sira hodi rona arguidu koalia kona-ba lezada atu lori sira nia oan ba lezada nia inan aman iha Metinaro, arguidu mos koalia katak lezada lori labarik sira ba iha Metinaro, lezada sei husik hela no sei sai ho mane seluk, iha momentu nee, lezada mos hatan husu kedas ba arguidu katak, o dehan saida, mak arguidu lori kadeira masa ida atu baku lezada, maibe arguidu nia maun ho naran FS mak satan netik hodi hadau kadeira soe tiha ba iha rai.
Arguidu mos konsege lori nia liman hodi tuku dala haat kona iha lezada, katak arguidu mos konsege foti nia liman hodi les lezada nia kotuk laran no kaer lezada nia liman rua hodi riba lezada tun iha rai, hodi rezulta lezada nia isin baku kona kadeira masa mos hetan estraga nomos halo kanek lezada nia liman kabun parte karuk.
Konsekuensia husi hahalok arguidu nian, lezada sente moras tanba bubu iha nia ulun, kotuk laran ho liman.
Arguidu halo ho forma livre, ho depropozitu halo agresaun fizika hasoru lezada AC nuudar arguidu nia kaben, katak aktus mak arguidu halo hasoru lezada, konsidera hanesan meiu ida hodi halo moras ba lezada nia isin, tuir buat neebe mак hakerek оna iha leten.
Hahalok arguidu nian ho konsiensia rasik no hatene katak hahalok nee lei bandu maibe arguidu halo nafatin.
Ho hahalok sira nee konsidera arguidu AS hanesan autor material ho forma konsumadu, pratika krimi ida, Violensia Domestika husi Lei n° 7/2010, ho forma ofensas integridade fizika simples, tuir artigu 145 husi Kodigu Penal.
Hatan ba akuzasaun nee, arguidu konfesa imparsial ba faktus, katak arguidu halo duni hahalok refere, maibe akontese tiha problema arguidu ho lezada diak malu fali.
Arguidu arepende tebes ba nia hahalok nee, no promete sei la halo tan iha futuru.
Lezada mos haforsa tan akuzasaun katak, arguidu halo agresaun hasoru lezada, tanba nee mak lezada sente la diak hodi ba hato keixa.
Rona tiha deklarasaun sira, Tribunal husu ba iha Prokurador atu tama ba iha faze alegasaun.
Liu husi alegasaun, Prokurador Aderito Tilman husu Tribunal atu aplika pena multa ba arguidu, no Defeza Jose Da Silva mos aseita pedidu Ministeriu Publiku nian.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Singular Jose Escurial, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku Jose da Silva.
(ter)
