DILI, STLTIMORLESTE.com – Tribunal Judisial Primera Instansia Dili liu husi desizaun ikus aplika pena multa US$ 45 ba arguidu ho inisial QM hanesan laen, tanba halo agresaun hasoru lezada ho inisial CS.
Iha desizaun loron Segunda (18/11/2024), Juiz prosesu Ana Paula deklara, provadu arguidu komete duni krime hasoru lezada, no arguidu konfesa imparsial ba faktus, tanba nee Tribunal tetu deklarasaun hotu, no ikus mai desidi aplika pena multa US$ 45 ba arguidu. Nunee kada loron arguidu tenke selu Uad$ 1.00 durante loron 45, Tribunal mos fiksa pena alternativu durante loron 30 iha prizaun, kuandu arguidu la selu pena multa refere.
Lee tiha desizaun, Tribunal mos esplika ba arguidu atu la konkorda ho desizaun nee bele halo rekursu.
Tuir akuzasaun neebe iha katak, iha loron no fulan neebe la apuradu maibe iha tinan 2023 iha Manleu, arguidu QM hanesan laen halo agresaun ba lezada ho inisial CS.
Momentu neeba arguidu lori liman basa iha lezada nia hasan, no dudu lezada halo monu ba rai.
Motivu husi problema nee, tanba deit arguidu hirus lezada gasta osan arbiru.
Konsekuensia husi arguidu nia hahalok nee, halo lezada sente moras iha fatin atinjidu hodi hatoo keixa.
Tanba nee, Ministeriu Publiku akuza arguidu pratika krime Violensia Domestika ho forma Ofensa Integridade Fizika Simples neebe previstu iha artigu 145 husi Kodigu Penal.
Hatan ba akuzasaun neebe iha, arguidu konfesa imparsial ba faktus katak, arguidu halo duni agresaun hasoru lezada, no motivu tanba deit lezada hanesan feen kaer osan la uza ho kuidadu hodi gasta arbiru.
Arguidu arepende tebes ba nia hahalok nee, no promete sei la halo tan iha futuru.
Audensia julgamentu nee prezidi husi Juiz Singular Ana Paula, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Manuel Exposto.
(ter)
