DILI, STLTIMORLESTE.com – Tribunal Judisial Primera Instansia Dili liu husi desizaun ikus kondena argudu ho inisial MA, tanba baku ka halo agresaun hasoru nia feen lezada ho inisial JC.
Iha desizaun loron Kuarta nee, Juiz prosesu Ana Paula deklara katak, faktus neebe konsta iha akuzasaun provadu hotu. Tribunal mos tetu deklarasaun husi lezada, Tribunal haree katak iha duni agresaun hasoru lezada.
Tanba nee, ikus mai Juiz prosesu desidi kondena arguidu ho pena multa US$ 100.00, Tribunal mos deklara pena alternativa, kuandu arguidu la kumpri desizaun Tribunal nian, arguidu sei tama prizaun durante loron 66.
Tribunal mos husu ba iha arguidu atu la aseita ho desizaun nee, bele liu husi nia defeza atu halo rekursu.
Tuir akuzasaun neebe iha katak, ofendidu JC moris hamutuk hanesan feen no laen ho arguidu, no sira iha oan nain neen.
Iha loron 07 fulan Abril tinan 2023, haleu oras tuku 19:00 iha Taibesi Dili, arguidu MA foti ofendida soe husi kama leten ba rai, no baku ofendida.
Konsekuensia direita husi agresaun fizika nee, ofendida hetan moras iha fatin atinjidu.
Arguidu MA, halo ho forma livre deliberada no konsientemente, hatene katak foti ofendida soe husi kama leten ba rai no baku ofendida, nudar meiu neebe aptu hodi hamosu ofensa ba ofendidu nia isin lolon no saude.
Arguidu hatene katak, nia hahalok nee proevidu no punidu tuir lei penal.
Konstitui arguidu MA, nuudar autor material ho forma konsumada ba pratika krimi Ofensa Integridade Fisika Simples ho forma Violensia Domestika previstu tuir artigu 145, husi lei kontra Violensia Domestika numeru 7/201.
Hatan ba akuzasaun neebe iha, arguidu deklara katak, faktus neebe konsta iha akuzasaun loos hotu, katak momentu neeba iha kalan arguidu fanu lezada, maibe lezada lakohi hader, tanba nee mak arguidu nervozu hodi dada lezada nia ain, riba tun mai rai.
Arguidu deklara, depois problema tiha iha dader lezada sai husi uma, hodi ba hela ho lezada nia familia sira, too agora lezada la fila mai sira nia uma.
Arguidu deklara tan, arguidu rasik mak kontaktu ba lezada atu fila mai sira nia uma hodi haree sira nia oan, maibe lezada lakohi ida. Arguidu arepende tebes nia hahalok nee.
Iha sala julgamentu laran lezada deklara katak, momentu neeba lezada isin kolen tanba nee mak arguidu fanu lezada, no lezada lakohi hader.
Lezada deklara, kalan nee arguidu rasta duni lezada soe husi kama tun mai rai, no hahu husi neeba kedan lezada sai husi sira nia uma.
Lezada deklara, sira laos foin problema nee, maibe antes nee iha ona problema, no agora lezada desidi lakohi fila ona ba arguidu, no desidi atu haree deit labarik sira.
Audensia julgamentu nee, prezide husi Juiz Singular Ana Paula, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Manuel Exposto.
(ter)
