DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu nain hitu (7), tanba komete krime hasoru lezadu HdM.
Iha faktus sufisiente katak, iha loron 01-01-2023, oras tuku 03h madrugada OTL, iha Aldeia Lemorai, Suku Vila Verde, Postu Administrative Vera Cruz, Munisipiu Dili, arguidu sira ho kondisaun lanu depois ba halo barulhu iha lezadu sira nia hela fatin.
Iha uma neebe lezadu HdM toba hela, maibe rona arguidu GD, DV, FA, DdS, RG, FdC ho nia kolega sira halo barulhu, tanba nee lezadu HdM sai ba hase dehan nusa mak imi mai hakilar fali iha nee.
Banhira koalia hanesan nee arguidu GD hatan ho lia fuan mal, no derepente arguidu AM lori liman hodi tuku kedas dala rua iha lezadu HdM nia kanurak, iha tempu hanesan arguidu GD lori liman hodi tuku dala ida iha lezadu HdM kotuk laran resulta moras.
Ho situasaun ida nee, lezadu RRP sai ba liur no haree arguidu GD diskuti malu hela ho lezadu HdM iha uma oin, tanba nee lezadu RRP ba hakalma tiha no lori arguidu GD hodi fila ba uma, maibe lao seidauk too 15 metru hanesan nee arguidu Ano, Aleri, Apepe, Abio Atoi no Aniziu hein tiha ona iha dalan.
Nunee diretamente arguidu AM foti liman hodi tuku kedas lezadu RRP ibun laran, rezulta raan no bubu iha lezadu nia ibun, arguidu Atoy mos lori liman hodi tuku dala ida iha lezadu RRP nia tun tilun hun parte karuk, arguidu Aleri lori liman hodi tuku dala ida iha lezadu RRP nia kanuruk rezulta lezadu monu.
Arguidu GD foti fatuk hodi tuda kona uluk iha lezadu RRP nia matan fukun, depois arguidu kontinua foti fatuk hodi tuda ba dala rua nian nee kona iha matan okos parte los no tama too matan laran.
Banhira lezadu monu tun tiha ba rai mak arguidu sira seluk hanesan Alori, Apepe, Able Anirio sira hotu halo asaun hasoru lezadu hanesan tuku, tebe no sama lezadu ba iha rai.
Konsekuensia husi arguidu sira nia konduta nee rezulta lezadu HdM hetan moras no bubu iha kotuk laran no lezadu RRP hetan kanek iha nia isin, moras no bubu nia matan parte los la funsiona ka difisiensia permanente.
Arguidu sira halo hahalok nee ho forma konsente, livre, deliberada, arguidu sira hatene katak tau sira nia forsa hamutuk hodi halo agresaun fisiku hasoru lezadu HdM ho RRP nee hanesan meiu neebe adekuadu hodi resulta lezadu sira hetan kanek moras no bele hetan difisiensia ba lezadu RRP nia orgaun importante, maibe arguidu sira hakarak halo hodi hetan resultadu ida nee.
Para alemde prosesu ida nee, arguidu DdSR , DVA no FdC, sira nia kualidade mos hanesan arguidu iha prosesu seluk ho NUC: 0250/22.PDDIL julga ona iha Tribunal.
Hahalok arguidu sira nian nee lei bandu no sei hetan kastigu tuir lei penal, maibe arguidu sira hakarak halo nafatin.
Tanba nee konstitui arguidu GD, DV, FA, DdS, RG, FdC no FdC nuudar ko autor material ba konkursu krime ho forma konsumadu, Pratika Krime ida (1) Ofensa Integridade Fisika Grave no krime ida (1) Ofensa Integridade Fisika Simples neebe previstu no punidu iha artigu 146º no artigu 145 husi kodigu Penal.
Hatan ba akuzasaun neebe iha arguidu DG deklara katak, lezadu monu ba rai nee arguidu la hatene se maka tuda, tanba momentu neeba depois de arguidu hetan duni husi ema, arguidu halai tiha ba sira nia uma.
Arguidu deklara tan, lezadu sira pertense ba grupu 77, no fatin neebe arguidu sira hela ba maka fatin warga nian, maibe arguidu sira la trenu ida.
Arguidu DV deklara katak, momentu neeba labarik ida iha sira nia bairo laran ba sosa sasan, maka iha mane ida baku labarik oan nee, tanba nee arguidu mos tuir ba hodi husu, maibe ho nervoju arguidu lori liman basa iha mane nee nia kanuruk.
Arguidu deklara, depois iha grupu boot ida mai ataka sira, tanba nee arguidu mos halai husi fatin akontesimentu.
Kona-ba lezadu arguidu la konhese ida, no momentu arguidu ba koalia ho mane joven nee, la haree lezadu iha neeba, tanha nee komaba lezadu hetan tuku no baku arguidu la iha konesementu ida.
Rona tiha arguidu, Tribunal adia ba loron seluk hodi rona arguidu sira seluk nia deklarasaun.
Audensia julgamentu nee, prezide husi Juiz Jose Gonsalves, Ministeriu Publiku reprezenta husi Prokurador Pedro Baptista, arguidu sira hetan asistensia legal husi Defensor Publiku Sergio Dias Quintas.
Jornalista: Terezinha De Deus
Editor: Xisto Mendonça
