DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial MF hanesan laen, tanba halo agresaun hasoru lezada hanesan feen ho inisial LCX.
Tuir akuzasaun neebe Juiz prosesu Jose Gonsalves lee sai iha loron Kinta (06/02/2025) katak, arguidu MF ho ofendida LCX moris hamutuk iha uma kain ida nuudar feen ho laen, hahu husi tinan 2019 too agora no ekonomikamente arguidu ho ofendida depende ba malu.
Iha loron 19 fulan Outubru tinan 2023, haleu tuku 21H00, ofendida iha hela nia prima nia uma neebe mak lokaliza iha Aldeia Metin 1, Suku Bebonuk, Postu Administrativu Dom Aleixo, Munisipiu Dili.
La kleur ofendida simu telefone husi arguidu neebe mak ho kondisaun lanu, no liu husi telefone arguidu hakilar ofendida ho lian mal, no dehan nusa la tun mai halo dosi, rona arguidu hakilar hanesan nee ofendida mos tauk fila kedan ba uma.
Kuandu ofendida too iha uma, arguidu hakbesik direta ba ofendida la koalia buat ida no halo kedan agresaun fizika hasoru ofendida ho forma, tebe dala ida kona iha lezada nia kidan, basa dala rua iha lezada nia kotuk laran no tuir mai tebe dala ida tan iha ofendida nia kidan hodi halo ofendida monu ba rai, bainhira ofendida monu iha rai, arguidu kaer iha ofendida nia fuk hodi rasta iha rai.
Konsekuensia direta no nesesariu husi hahalok arguidu nian nee, ofendida sofre moras no bubu iha kidan parte los ho karuk no kotuk laran, maibe ofendida la halo tratamentu iha Sentru Saude ruma.
Arguidu halo nia hahalok nee livre, ho intensaun no hanoin rasik no arguidu hatene momos katak, agresaun fiziku neebe nia halo ba ofendida isin lolon nee adekuadu, no kauza moras no bubu iha ofendida nia isin lolon, tuir saida mak arguidu hakarak.
Arguida mos hatene katak, nia hahalok nee proibidu no punidu tuir lei penal. Ho hahalok sira nee, konstitui arguidu nuudar autor material ho forma konsumadu ba krimi Violensia Domestika ho Forma Ofensa Integridade Fizika Simples neebe previstu iha artigu 145 Kodigu Penal, no konjuga ho lei kontra Violensia Domestika nian numeru 07/2010, loron 07 fulan Julhu.
Hatan ba akuzasaun neebe iha, arguidu konfesa imparsial ba faktus katak, arguidu halo duni agresaun ba nia feen, tanba momentu neeba ho kondisaun lanu.
Arguidu deklara, depois akontese tiha problema nee, lezada fila ba uma sira diak malu fali, hahu husi neeba too mai agora la iha tan problema ona.
Lezada mos haforsa tan akuzasaun neebe iha katak, arguidu halo duni agresaun ba lezada, no hahu husi prolema nee too mai agora la iha tan problema ona.
Rona tiha arguidu no lezada, iha alegasaun Prokuradora Ivonia Guterres konsidera katak, arguidu nia hahalok prienxe krimi neebe Ministeriu Publiku akuza ba.
Tanba nee MP mantein ho akuzasaun neebe iha, solisita ba iha Tribunal Singular atu kondena arguidu fulan 6 prizaun suspende ba tinan 2.
Enkuantu husi parte defeza, Defensor Publiku Joao de Carvalho husu Tribunal tetu sirkunstansia hotu, arguidu foin primera vez mai iha Tribunal, husu atu aplika pena multa ba arguidu.
Rona tiha deklarasaun arguidu no lezada nian, Tribunal adia ba loron seluk hodi rona desizaun.
Audensia julgamentu nee prezide husi Juiz Singular Jose Gonsalves, Ministeriu Publiku reprezenta husi Prokuradora Ivonia Guterres, arguidu hetan asistensia legal husi Defensor Publku João Carvalho.
(ter)
