DILI, STLTIMORLESTE.com – Ministeriu Publiku iha alegasaun ba krimi violensia domestika ho maustratus ba menor, solisita ba iha Tribunal Koletivu atu aplika pena suspensaun ba arguidu FdSB hanesan laen, neebe komete krimi hasoru lezada ho inisial SJG hanesan feen, no lezada BF hanesan oan.
Iha sala julgamentu laran Prokuradora deklara, faktus neebe iha balu arguidu konfesa, maibe balu arguidu nega.
Prokurador deklara, konaba krime maustratus ba menor konsidera provadu, maske arguidu nega la lori kapasete baku lezada BF hanesan oan no halo tauk deit, maibe Prokuradora hare katak, labarik sei kiik se halo tauk deit bele mos afeta nia hanoin, halo nia bele trauma.
Tanba nee konaba krime mautratus ba menor MP mantein ho akuzasaun neebe iha, hodi husu Tribunal atu aplika pena prizaun tinan tolu no suspende tinan tolu ba arguidu.
Konaba krimi violensia domestika ho forma ofensa integridade fisika simples hasoru lezada SJG arguidu nia feen, MP husu Tribunal atu aplika pena multa ba arguidu.
Enkuantu defeza husi arguidu sira nian deklara katak, konaba krime Mautratus ba Menor la prense ida, tanba nee husu Tribunal atu absolve arguidu.
Konaba krime violensia domestika ho forma ofensa integridade fisika simples, defeza mos aseita ho pedidu MP nian husu atu aplika pena multa ba arguidu.
Rona tiha alegasaun, Tribunal adia ba loron seluk hodi rona leitura akordaun.
Audensia julgamentu nee prezide husi Juiz Kolektivu, Ivan Patrocenio, Zulmira Auxiladora, Arjentino Nunes, Ministeriu Publiku reprezenta husi Prokuradora estajiadu nain rua, arguidu hetan asistensia legal husi Defensor Publiku Fransisco Martins.
Jornalista: Terezinha De Deus
Editora: Domingas Gomes
