DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial TMA, tanba halo agresaun ba nia oan mane rasik ho inisial JAM.
Tuir akuzasaun neebe Juiz prosesu Jose Maria lee sai iha loron Segunda (20/01/2025) katak, iha loron 14 fulan Outubru tinan 2023 maizumenus iha oras 10h00 dadersan, iha suku ida iha Dili laran, arguidu sei toba hela iha kuartu laran, rona lezadu ho nia alin feto diskuti malu tanba deit lezadu uza nia alin feto nia motorizada hodi ba servisu iha kompanhia rudal no sai fali servisu iha oras 00:00 kalan, iha fali dadersan nia alin feto ho naran E koalia barak kona-ba motorizada nee, nunee lezadu nervozu hodi diskuti malu ho nia alin feto E.
Arguidu hanesan aman sei toba hela iha kuartu laran, no rona lezadu ho nia alin feto diskuti malu makaas, nunee arguidu hader mai hodi hateten ba lezadu katak, hakarak buka problema ho nia feton, nunee lezadu hatan ba arguidu katak, nia feton hola mane ona haree sai husi uma, tanba deit lia fuan nee arguidu hirus hodi basa kedas lezadu nia oin, no lezadu satan ho liman mak lezadu nia liman rasik kona nia matan fukun parte loos hodi rezulta raan no nakles, hetan suku pontu tolu iha Postu Saude Komoro, durante loron tolu mak foin rekupera fali lezadu nia kanek.
Konsekuensia husi arguidu nia konduta nee mak kauza lezadu hetan moras iha matan fukun parte loos, no nakles no raan sai barak hodi hetan suku pontu tolu.
Arguidu hakarak ho intensaun hodi liman basa iha lezadu nia matan fukun parte loos ho forma sira neebe livre, ho konsientemente no la ignora karakter sensuravel nia konduta.
Arguidu atua nia konduta nee ho forma neebe livre no konsientemente la ignora karakter sensuravel, ho nia konduta arguidu mos hatene katak, nia konduta nee nuudar aktu ilisitu ka kontra lei, maibe nia atua nafatin.
Ho nunee arguidu hanesan autor material ho forma konsumada ba krimi Violensia Domestika ho forma Ofensa ba Integridade Fizika Simples neebe previstu iha artigu 145 Kodigu Penal.
Hatan ba akuzasaun nee, arguidu konfesa imparsial ba faktus katak, motivu husi problema nee tanba arguidu nia oan mane lezadu diskuti malu ho arguidu nia oan feto kona-ba motor.
Arguidu rekonhese, momentu neeba arguidu lori duni liman tuku lezadu no lori lezadu ba halo tratamentu iha Sentru Saude Komoro. Maibe iha momentu neeba kedan arguidu ho lezadu diak malu.
Lezadu mos haforsa tan, komesa husi neeba too mai agora sira la iha tan problema ona, no oras nee daudaun lezadu kontinua hela ho arguidu neebe hanesan nia aman.
Rona tiha deklarasaun sira nee, iha alegasaun Prokuradora Ivonia Guterres konsidera katak, arguidu konfesa ba faktus neebe iha, tanba nee Prokuradora mantein ho akuzasaun neebe iha hodi solisita ba iha Tribunal Singular aplika pena prizaun fulan 3, suspende tinan 1 ba arguidu.
Enkuantu husi parte defeza nian husu Tribunal tetu sirkunstansia hotu, hodi aplika pena neebe justu ba arguidu.
Rona tiha alegasaun sira nee, Tribunal adia ba loron seluk hodi rona desizaun.
Audensia julgamentu nee prezide husi Juiz Singular Jose Maria, MP reprezenta husi Prokuradora Ivonia Guterres, arguidu hetan asistensia legal husi Defensor Publiku Sebastiao Amado.
(ter)
