DILI, STLTIMORLESTE.com – Tribunal Judisial Primera Instansia Dili halao julgamentu ba arguidu nain haat (4) ho inisial AO, SC, AA no JO, tanba baku kanek ka komete krimi hasoru lezadu ho inisial RLS.
Prosesu julgamentu nee halao iha Tribunal Dili iha loron Kuarta 23/10/2024.
Iha sala julgamentu laran, Juiz prosesu Fransisca Cabral lee sai akuzasaun katak, iha loron 15 fulan Janeiru tinan 2023, iha Suku Railaku, Posto Administrativu Ermera, lezadu RLA ta ai neebe hamriik iha baliza entre arguidu sira ho lezadu nian, no arguidu sira hatete ba lezadu katak, o ta ai nee husu iha se.
Lezadu la hatan buat ida hodi kontinua ta ai halo uma, derepente ai monu hanehan arguidu nia hudi halo tohar, tanba ida nee mak arguidu AO, SC, AA no JO, hamutuk raut fatuk tuda lisuk lezadu iha ai leten atinji iha lezadu nia kotuk laran no kanotak.
Arguidu sira mos ameasa lezadu atu sobu lezadu nia uma, se la sobu ahi sei han tiha uma nee, nunee akontese duni iha tuku 22h00 ahi han tiha lezadu nia uma no sasan sira iha uma laran.
Konsekuensia husi arguidu sira nia hahalok nee, lezadu hetan kanek iha isin lolon, no sasan sira ahi han hotu.
Tanba nee, Ministeriu Publiku akuza arguidu nain haat komete krime, Ofensa Integridade Fisika Simples neebe previstu iha artigu 145, no krime Insendio artigu 263 husi Kodigu Penal.
Hatan ba faktus neebe iha arguidu nain haat deklara katak, momentu neeba sira nain haat lori duni faktus tuda lezadu, razaun tanba lezadu tesi sira nia ai la husu, depois sira ba hare lezadu lori katana duni sira, ho nunee maka sira tauk foti fatuk hodi tuda lezadu.
Arguidu nain haat deklara, razaun sira lori fatuk tuda lezadu hodi salva sira nia an hodi halai ses husi fatin neeba, tanba sira tauk lezadu, no lezadu hanesan ema kondenadu ida uluk komete ona kazu oho mate ema ida tama iha Prizaun foin sai.
Arguidu nain tolu deklara, sira lori duni fatuk tuda lezadu, maibe konaba sunu uma laos sira maka sunu, tanba uma lezadu nian ahi han kalan boot.
Iha sala julgamentu laran lezadu deklara katak, momentu neeba lezadu ba tesi ai atu halo kama hodi prepara fatin ba lezadu nia fen atu partus. Lezadu rekonese tesi ai monu tun mai kona duni arguidu sira nia hudi.
Lezadu deklara, momentu neeba hudi tohar, arguidu sira hamutuk ba foti fatuk tuda lezadu neebe sei iha ai leten, to fatuk kona lezadu nia liman kanek boot.
Lezadu deklara, nia uma ahi han duni uma dapur, neebe tau sasan no osan, maibe se maka sunu lezadu la hare ho matan.
Aleinde nee, sasin FS deklara katak, momentu neeba sasin haree ho matan, arguidu sira maka lori kalan ba sunu lezadu nia uma.
Rona tiha arguidu no lezadu sira, Tribunal husu Prokurador atu tama ba iha alegasaun.
Iha alegasaun nee, Prokurador husu ba iha Tribunal atu halo alterasaun kualifikasaun juridika husi krimi insendiu ba iha Danu Simples, tanba prejuizu neebe sofre ahi han nia valor la boot.
Enkuantu husi Defeza, husu Tribunal tetu sirkunstansia hotu, no aplika pena neebe justu ba iha arguidu sira.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee, prezide husi Juiz Kolektivu, Afonso Carmona, Fransisca Cabral, Jose Escuriao, Ministeriu Publiku reprezenta husi Prokurador Ricardo Gouveia, arguidu hetan asistensia legal husi Defensor Puliku Sergio Dias Quintas.
(ter)
