DILI, STLTIMORLESTE.com – Tribunal Judisial Primeira Instansia Dili (TJPID) julga arguidu nain tolu (3) ho inisial JdA, AdCP no RBR, tanba komete krime hasoru lezadu inisial ADPB.
Tuir akuzasaun neebe iha katak, iha indisus sufisiente 01/07/2017 iha Suku Komoro.
Iha tempu neeba lezadu iha hela nia uma, maibe arguidu nain tolu ho nia tiu inisial L ba iha lezadu nia uma no bolu lezadu ba liur hodi husu tuir kona-ba ema neebe fihir lezadu iha tempu neeba, nunee sira mos hatan malu.
Husi hatan malu nee arguidu AdCP tuku dala ida iha lezadu nia hasan parte karuk, nunee lezadu mos defende an hodi tuku hasoru, maibe arguidu JdA lori ain tebe iha lezadu nia kabun, halo lezadu monu tun ba rai.
Banhira lezadu monu tun ba rai, arguidu AdCP no RBR halo asaun hasoru lezadu hanesan baku tebes no sama lezadu nia kotuk laran rezulta kanek no bubu.
Ho arguidu sira nia asaun violensia no agresaun fiziku halo lezadu monu ba rai labele hader. Arguidu sira lori besi kanu tama ba uma laran baku lezadu nia sasan rahun hotu, inklui motor rua.
Total prejuizu neebe lezadu hetan ho valor US$ 3880.
Tanba nee Ministeriu Publiku akuza arguidu sira komete krime, Dano ho Violensia neebe previstu iha artigu 260 husi Kodigu Penal.
Hatan ba akuzasaun nee arguidu JdC deklara katak, konaba akontesimentu loron nee loos, no arguidu ho lezadu sira relasaun vizinu, lezadu dun dehan ema rega bee kona lezadu, ho ida nee maka mosu provokasaun hodi ikus mai hamosu problema.
Arguidu deklara, akontese tiha problema lezadu ba foti samurai hodi taa iha arguidu nia maun nia oan nia liman.
Arguidu nega, la baku no tuku lezadu, no la tama ba iha uma laran hodi baku sasan rahun.
Arguidu AdCP deklara mos katak, kona-ba sasan laos arguidu maka baku, tanba momentu neeba ema barak.
Alende nee, arguidu RBR deklara katak, laos arguidu maka baku lezadu nia sasan rahun.
Rona tiha arguidu, Tribunal konfirma ba iha lezadu no lezadu mos deklara katak, momemtu neeba iha serimonia graduasaun iha lezadu nia uma, mak arguidu sira mos mosu ba hodi buka tuir ema balu, ikus mai lezadu hatudu arbiru, mak akontese tiha problema.
Lezadu mos deklara, konaba sasan neebe estragus lezadu la hare ho matan se maka estragus, tanba momentu neeba lezadu ba tiha iha Sela Polisia mak ema estragus lezadu nia sasan iha uma laran, inklui no sasan sira iha kios.
Lezadu deklara, sira rezolve ona tuir familia, maibe kona-ba sasan neebe estragus seidauk selu, tanba lezadu rasik la haree se mak halo estragus. No momentu lezadu iha sela, lezadu nia feen no oan sira mak iha hela uma.
Rona tiha lezadu, Tribunal adia ba loron seluk hodi rona sasin sira.
Audensia julgamentu nee prezide husi Juiz Kolektivu, Ivan Patrocenio, Zulmira Auxiliadora, Arjentino Nunes, Ministeriu Publiku reprezenta husi Prokurador Bartolomeo de Araujo, arguidu hetan asistensia legal husi Defensor Publiku Joao de Carvalho.
(ter)
