DILI, STLTIMORLESTE.com – Too oras nee Bankada FRETILIN seidauk iha informasaun klaru kona-ba insidente neebe akontese bala musan tama rezidensia eis Prezidente Republika (PR), Francisco Guterres Lú Olo, atual Prezidente Partidu FRETILIN.
Xefe Bankada FRETILIN, Aniceto Guterres hatete, kona-ba ida nee nia parte labele pronunsia buat ruma. “Kona-ba kestaun nee rona duni, maibe laiha informasaun kompletu, tanba nee hau labele pronunsia buat ida”, katak Xefe Bankada FRETILIN, Aniceto ba jornalista sira iha PN, Dili, Tersa (07/01/2025).
Iha fatin hanesan, Deputadu husi Bankada CNRT, Natalino dos Santos hatete, rona ida hanesan supreza ida, katak ema tiru bala musan tama rezidensia Eis Prezidente Republika, Francisco Guterres Lú Olo.
“Ita koalia kona-ba tiru, entaun husu ba instituisaun kompetente atu halo inventigasaun hodi hatene loos bala musan mai husi neebe, se mak tiru”, katak Natálino.
Tuir nia, bainhira rona tiru deit, mak ema politiku sira halo komentariu hodi jeneraliza nee la diak, tanba nee presiza kros cek ho instituisaun relevantes atu bele halo inventigasaun.
Tanba akontesimentu nee konsidera krimi, tanba nee husu ba parte PNTL, PNSIK, PSIK, halo inventigasaun profunda hodi bele klareza ho akontesimentu nee.
Entretantu Deputada husi Bankada PLP, Maria Angelina Sarmento hatete, kona-ba insidente nee, nia parte labele pronunsia buat ida, tanba nee presiza loke inventigasaun, nunee bele hatene sa motivu mak lori bala musan nee bele monu iha rezidensia eis PR Lú Olo.
(gui)
