DILI, STLTIMORLESTE.com – Liga ho bala musan neebe tama iha Timor Leste (TL), Prezidente Republika Jose Ramos Horta hatete, sei hein informasaun husi Polisia Nasional Timor Leste (PNTL).
Prezidente Republika Jose Ramos Horta hatoo kestaun nee ba jornalista sira, hafoin vizita Autoridade Munisípiu Dili iha Kaikoli, Kuarta (15/10/2025).
PR Horta hatete, liga ho bala musan bidon tolu tama TL liu husi Portu, mak Prezidente Republika Jose Ramos Horta hatete, hein informasaun mai husi Polísia Nasional Timor Leste (PNTL), tanba bala musan nee mai husi Amerika rai ida konfiansa, liu husi Singapura rai konfiansa, depois mai Timor Leste.
PR Horta dehan, se mak enkomenda, enkomenda atu halo saida. Tanba nee Prezidente dehan nee nia la hatene, nee laos perigozu.
“Hau hein informasaun mai husi polísia tanba buat nee mai husi Amerika rai ida konfiansa, liu husi Singapura rai konfiansa, depois mai nee se mak enkomenda, enkomenda atu halo saida, hau la hatene nee laos perigozu,” dehan PR Horta.
Xefe Estadu hatete, bala musan balun hanesan sai tiha ona, problema iha Timor nee buat oan ida akontese sai kedas drama ida, tanba nee Prezidente ladun preokupa.
“Hau laiha preokupasaun, polísia halo investigasaun depois halo report ba Primeiru Ministru, ba Prezidente Republika depois mak haree tama oinsa. Hau hanoin buat nee laos problema boot ida, hanoin prosesu normal ida depois sira la presiza tiha ona, rai tiha neeba deit,” dehan PR Horta.
Xefe Estadu hatete, tuir nia hanoin nee laos problema boot ida, maibe rai nee laiha liu ameasa, buat hotu-hotu lao diak hela, ema estranjeiru mai hotu-hotu kontente admira fo parabens.
Nia argumenta, polítiku balun tanba sira laiha kadeira iha governu mak buat hotu-hotu la diak, aat hotu, ema sira husi liur lubuk ida neebe konvida mai nee sira hotu-hotu admira. Hanesan Australinu, Amerikanu, semana-semana mai, sira hotu-hotu kontente.
Jornalista: Emerenciana Pinto
Editor: Xisto Mendonça
