DILI, STLTIMORLESTE.com – Edukasaun Munisipiu Manatuto fo ona orientasaun ba Diretor eskola idak-idak, bandu labele kastigu estudantes foun iha prosesu orientasaun, kuandu mosu tenke fo xamada ba Diretor Eskola.
Liafuan nee hatoo husi Diretor Servisu Edukasaun Munisipiu Manatuto, Patricio da Cruz Quintao ba STL liu husi telefone, Segunda (13/01/2025).
“Ita la autoriza kastigu estudantes iha orientasaun laran. Hanesan orientasaun iha fatin balun duir tun sae nee ita bandu,.nee ita fo xamada kedas ba Diretor Eskola sira. Orientasaun ba estudantes foun nee balu halao tiha ona no balu mak foin komesa ohin,” nia esplika.
Patricio hatutan, antes orientasaun lao, Edukasaun Munisipiu fo ona orientasaun ba Diretor Eskola idak-idak halo orientasaun neebe fo konhesimentu ba ambiente eskola nian, no esplika kona-ba materia kada disiplina idak-idak, inklui regras husi eskola sira, laos halo orientasaun ida neebe duir tun sae estudante sira.
Nia katak, Eskola Katolika mak ladun hatene, maibe eskola publika kuaze fo ona orientasaun ba sira atu labele kastigu labarik sira.
Nee duni husi eskola idak-idak halao atividades orientasaun nee liga ho labarik sira nian konhesimentu.
Iha fatin seluk, Diretor Servisu Edukasaun Munisipiu Likisa, Julio da Silva hatete, eskola idak-idak mak sei halo orientasaun ba estudantes foun sira, maibe halo orientasaun neebe bazeia ba atividades eskola nian.
(jac)
