DILI, STLTIMORLESTE.com – Visi Primeiru Ministru; Mariano Assanami Sabino hatete, karta sirkular neebe mak hasai husi Ministra Saude Elia do Reis bandu mediku halo atendimentu iha Klinika Privadu sira, nee parte husi rezolusaun ida.
Visi Primeiru Ministru, Mariano Assanami Sabino hatoo kestaun nee ba jornalista iha Palasiu Prezidensial Bairo Pite, Sesta (06/12/2024).
Nia hatete, karta sirkular neebe hasai husi Ministra Saude ba Doutor sira, ida nee parte husi rezolusaun, maibe nia sei halo koordenasaun ho MS hodi haree ba kestaun nee.
“Ita iha lei rejime espesial nee ba los deit saude no edukasaun, maibe ba funsionariu sira saude no edukasaun ita hasai iha 2012 iha Governu AMP nia tempu, IV Governu Konstitusional, depois iha Governu dala walu nian, sira reviu oituan iha 2022 sira mos la konsege implementa, kuandu momentu lei rejime espesial nee sai ita hasae deit salariu. Uluk salariu kiik maibe konsege hasae salariu doutor, no enfermeira, doutor espesial sira, mais iha lei nee nia laran nee artigu lubuk ida ke presiza kumpri, tanba liu ba nee ladun kumpri diak,” katak Visi PM nee.
Nia katak, lei nee agora kontinua haree oinsa mak bele kumpri, lei nee hanesan mos iha edukasaun lei ida husik hela, agora ministeriu implementa hela ba teste neebe mak halo nee. No Konselhu Ministru mos hasai rezolusaun ida kona-ba esklusibilidade neebe funsaun publika iha.
Primeiru Ministru, Kay Rala Xanana Gusmão mos orienta ona ba funsaun publiku atu tau matan no implementa rejime espesial ba iha parte saude no edukasaun.
Primeiru Ministru orienta ona, no funsaun publiku sei halo aprezentasaun kompletu iha pareser Konselhu Ministru sei mai nee 2025, para haree hodi adapta OJE ba iha salariu neebe mak merese duni tuir rejime espesial ba mediku nomos ba profesores sira.
(eme)
