DILI, STLTIMORLESTE.com – Bankada CNRT liu husi Deputadu Virgilio Pereira husu ba Ministeriu Obras Publika (MOP) atu tau atensaun ba komunidade sira neebe mak too agora seidauk asesu ba iha linha eletrisidade.
Kestaun nee hatoo husi Bankada CNRT, Deputadu Virgilio Pereira ba jornalista sira iha plenaria Parlamentu Nasional, Tersa (16/09/2025).
“Iha fatin ida nee hakarak hatoo hela ba Ministeriu Obras Publika (MOP) atu tau atensaun ba iha komunidade sira neebe mak seidauk asesu ba linha eletrisidade, liu-liu iha Aldeia Waiarbou, Postu Administrativu Watulari, neebe mak too agora seudauk asesu ba iha linha eletrisidade,” dehan Deputadu Virgilio.
Nia dehan, eletrisidade husi Waihae nee pur-volta de 3 kilo deit ona, tanba nee presiza tau atensaun ba aldeia neebe mak ohin sita ona.
Iha fatin hanesan, Deputadu Natalino dos Santos husi Bankada CNRT hatutan, iha Aldeia Somoknua, Suku Louro, Postu Administrativu Zumalai, Munisipiu Kovalima, aldeia nee izoladu tebes too ohin loron komunidade sira seidauk asesu ba linha eletrisidade no estrada.
“Hau iha asuntu ida atu koalia, liu-liu kona-ba eletrisidade ba iha aldeia ida naran Sumoknua nee izoladu tebes too agora komunidade sira seidauk iha linha eletrisidade atu asesu,”.dehan deputadu Natalino.
Tamba nee nia husu ba Ministeriu Obras Publika (MOP) atu haree ba asuntu ida nee no tau atensaun ba Aldeia Sumoknua nee.
Entretantu hatan ba deputadu sira nia preokupasaun nee fo ba tekniku sira iha Parlamentu Nasional (PN) anota hela hodi hatoo ba parte relevante sira, liu-liu ba iha MOP hodi haree ba asuntu ida nee.
Jornalista: EST 1
Editor: Xisto Mendonça
