DILI, STLTIMORLESTE.com – Bankada CNRT, Bankada PD no Bankada KHUNTO liu husi plenaria estraordinariu aprezenta ona proposta lei ida ba meza Parlamentu Nasional (PN), husu atu halakon total lei Pensaun Vitalisia.
“Senhor Prezidente, hau foti pontu de orden atu hateten deit katak konsistensia ho deklarasaun Bankada Governu nian kona-ba projetu atu halakon total lei Pensaun Vitaliisia,” hatete Visi Xefe Bankada partidu CNRT, Patrocinio Fernandes liu husi plenaria iha PN, Sesta nee (19/09/2025).
Patrocinio husu meza Parlamentu Nasional atu baisa mos proposta neebe Bankada CNRT aprezenta ona, nunee bele diskute iha loron 25 Setembru agora.
“Projetu ami submete ona ba meza, favor ida husu ba meza atu baisa mos para ita bele haree obrigadu,” dehan nia.
Iha fatin hanesan, Prezidente Parlamentu Nasional Interinu, Deputadu Alexandrinho Afonso Nunes hateten, daudaun nee meza Parlamentu Nasional simu ona projetu rua.
“Agora daudaun iha mapa nee iha projetu rua,” dehan Deputadu Alexandrinho Afonso.
Nunne mos Deputada Bankada KHUNTO, Olinda Guterres husu meza Parlamentu Nasional avansa lalais ba votasaun ba pedidu urjensia kona-ba projetu lei numeru 10/VI (3a), rejime juridiku seguransa sosial ba eis titulares orgaun Soberania.
“Lalika kolia barak, ita avansa ba votasaun, urjenti nee ita kolia kona-ba urjenti nian laos kolia dada ba dada mai nee la los ona Senhor Prezidente, hau hakarak avansa ona ba votasaun, nunee iha loron 25 Setembru agora nee halo lakon tiha lei Pensaun Vitalisia mos diak, lae ulun moras,” rekomenda Deputada Olinda Guterres.
Entretantu iha reuniaun plenaria estraordinariu nee, deputadu sira aprova ona pedidu urjensia kona-ba diskusaun projetu lei numeru 10/VI (3a), rejime juridiku seguransa sosial ba eis titulares orgaun Soberania, ho votu Afavor 59, kontra 0 no abstensaun 0.
Jornalista: Alberto Menezes
Éditora: Carme Ximenes
