DILI, STLTIMORLESTE.com – Deputadu Natalino dos Santos husi Bankada CNRT preokupa tebes ba bilhete aviaun neebe mak folin sae makaas.
“Hau husu Governu atu haree, tanba sa? ita tau tiha subsidiu ba aviaun aero maibe tanba sa mak folin nee sae makaas, ida nee preokupasaun tebes ba populasaun sira,” dehan Deputadu Natalino iha nia knaar fatin Parlamentu Nasional, Segunda nee (17/03/2025) .
Deputadu nee haktuir, Governu despaixu tan aviaun ida, maibe tanba saida too agora la implemeta, depois kompetisaun hodi bele hatun folin aviaun nian, tanba nee hau husu ba Governu atu haree ba asuntu ida nee.
Visi Prezidente Asuntu Parlamentar, Aderito Hugo hatutan, Ministeriu Transporte no Telekomunikasaun sei haree ba asuntu ida nee, kona-ba bilhete neebe presu sae voo Dili ba Bali konsidera aas tebes-tebes.
“Ita hatene katak iha periodu balu iha tinan uluk ita nia presu bilhete nee baratu US$ 78 too US$ 80 deit, agora ba mai Dili pur volta US$ 200,” katak Vise Prezidente Parlamentu, Aderito Hugo.
Governante nee haktuir, wainhira loke nafatin merkadu koletividade Aero nia ba Airline, barak liu tan bele atinji presu nee tun automatikamente iha periodu balu, iha 2010 populasaun goza hela presu bilhete, numeru viajen neebe mak uza aviaun nian ba Bali barak tebes.
“Merkadu livre ida ba konektividade aero ninian iha impaktu ba presu bilhete baratu ajuda ita nia populasaun atu bele asesu ba trasporte aero tuir sira nia kapasidade neebe mak iha,” katak Aderito Hugo.
Governante nee haktuir, merkadu nee aberta ona ba kualker operadora ba aviaun, hein katak ministeriu relevante halo jestaun ba ida nee, importante mak tenke atinji merkadu ida aero ninian no komersial livre duni hanesan halo ona laiha monopolio.
(EST 2)
