DILI, STLTIMORLESTE.com – Bankada Governu iha Parlamentu Nasional (PN) kestiona deputadu sira husi Bankada Partidu FRETILIN neebe iha loron Tersa (06/05) interven servisu Sekretariu Estadu ba Asuntu Organizasaun Urbana (SEATOU) wainhira realoka komunidade sira neebe hela iha karantina Tasi-Tolu ba idak-idak nia munisipiu.
Deputada Bankada Partidu Demokratiku (PD), Armando Lopes hateten, nia parte la aseita ho Bankada Partidu FRETILIN halo intervensaun ba servisu SEATOU nia, tanba fatin ba deputadu sira atu kestiona mak liu husi plenaria Parlamentu Nasional.
“Ida nee hau hanoin katak hau seidauk bele fo komentariu, tanba hau nia vizaun mak nee, interpretasaun ho governu nee ita mai halo liu husi plenaria. Agora plenaria interpretasaun nee ita lori fali ba iha publiku, hau pesoal senti ladun diak,” hatete Visi Xefe Bankada Partidu Demokratiku, Armando Lopes ba jornalista sira iha Parlamentu Nasional, Kuarta (07/05/2025).
Nia hatutan, Bankada Partidu FRETILIN sira bele hatoo sira nia aspirasaun atu defende vítima despezu administrativu, maibe labele aproveita momentu sira hanesan hodi interven servisu SEATOU nian.
“Ita bele aproveita ho situasaun atu kolia oinsa atu hatoo ita nia aspirasaun atu defende povu maibe fatin ba deputadu sira atu halo interpretasaun mak bolu membru governu hatan ita nia preokupasaun nee iha plenaria nee, mas hau la hatene saida mak akontese horiseik,” tenik nia.
Iha fatin hanesan, Deputadu Bankada Partidu FRETILIN, David Dias Ximenes Mandati la aseita ho deklarasasaun husi Bankada Governu neebe dun Bankada Partidu FRETILIN halo intervensaun ba servisu SEATOU.
Mandati afirma, Timor Leste adopta sistema demokrasia konstituisional, tanba ida nee mak papel Parlamentu Nasional liu husi deputadu sira fiskalilizador no lejislador ho tan politika nee tenke lao hamutuk entaun ho nunee deputadu bele ba observa saida mak governu halo.
“Ami la halo intervensaun maibe ami ba rona povu nia halerik, ita nuudar deputadu ita fiskaliza no observa ezekutivu ninia servisu, ami ba iha neeba ami rona dehan katak Governu ba ona promete ba populasaun atu ganti rugi mak sira sai mas horseik nee sira ba obriga deit, tanba nee ami ba laos interven, ami ba husu esklaresimentu, maibé tanba buat ba hasoru direita malu entaun sai hirus malu,” hatan Deputadu David Dias Ximenes Mandati.
Nia dean, Bankada Partidu FRETILIN la impede dezenvolvimentu nasaun nee, maibe dezenvolvimentu atu lao iha nasaun nee, ema mak tenke sai sujeitu ba dezenvolvimentu, labele sai objetu ba dezenvolvimentu.
“Se ita dehan atu lori fila ita nia ema sira nee ba foho ga sira nia fatin moris nee los, mas ita mos lo-loos nee ita hatene interpreta fenomeno nee, tanba saida mak populasaun sira mai buka moris iha Dili tanba saida,” nia argumenta.
“Ida deit mak tanis karik ita sei tolera maibe ema barak tanis nee, ida nee mak ita sente ba la diak, ita sente ba nee dehan uluk Indonezia nia tempu mós hanesan nee ona,” nia hakotu.
(alb)
