DILI, STLTIMORLESTE.com – Bankada Partidu Libertasaun Popular (PLP) iha Parlamentu Nasional (PN) duvidas ho kompromisu IX Governu Konstitusional atu dada kadoras Greater Sunrise mai Timor Leste.
“Agora ita nia konsentrasaun investimentu kuaze ba hotu Projetu Tasi Mane, tanba ita hakarak esplorasaun Greater Sunrise bele hahu no dada kadoras mai Timor Leste, atu bele hadia no dinamiza ita nia ekonomia. Maibé ita hatene katak IX Governu mos sei la dada kadoras Greater Sunrise mai Timor Leste to mandatu hotu,” hateten Deputada, Maria Angelina Sarmento iha ambitu debate OJE 2025 iha PN, Kuarta (20/11/2024).
Nia hatutan, maske deputadu sira husi Bankada Governu dala barak deklara katak iha tinan 2025 kadoras sei dada mai Timor, maibe sei la akontese, tanba faktus mak Ministru Petroleo Rekursu Minerais deklara katak, so iha tinan 2032-2034 foin dada kadoras Greater Sunrise mai Timor Leste.
“Deklarasaun Ministru Petroleo nian iha debate espesialidade kontradis fali ho Presidente Partidu CNRT neebe agora nuudar PM, altura iha kampanha deklara katak, wainhira CNRT kaer ukun, 2025 hahu ona dezenvolvimentu no esplorasaun ba Kampu Greater Sunrise no tinan 2026 osan husi Kampu Greater Sunrise mos bele tama ona ba Fundu Petroliferu hodi asegura no halo boot liu tan fundu ida nee,” realsa nia.
Maske nunee Deputada Bankada Oposizaun deklara, se tinan 2030 mak Timor Leste sei halo esplorasaun mak ba oin sei hasoru difikuldade boot.
“Se Timor Leste la esplora Kampu Greater Sunrise antes 2030 mak Timor Leste sei hasoru difikuldade ba polítika global zero emission neebe nasaun boot sira hakarak atinje. Saida mak Governu inkapasidade nia planu atu asegura sustentabilidade Fundu Petrolíferu bainhira la tau prioridade ba esplorasaun Kampu Greater Sunrise iha tempu besik nia laran,” nia hakotu.
(alb)
