DILI, STLTIMORLESTE.com – Kompanhia aviasaun Batik Air sei loke voo husi Kuala Lumpur, Malazia ba Dili, Timor Leste. Servisu ida nee sei sai hanesan uniku.
“Batik Air ho satisfasaun boot anunsia lansamentu rota foun ho voo direta husi Kuala Lumpur (KLIA Terminal 1) ba Dili, Timor-Leste. Voo ida nee sai hanesan primeiru no uniku servisu komersial direta husi Malazia ba Timor-Leste,” dehan Corporate Communications Strategic of Batik Air, Danang Mandala Prihantoro iha komunikadu ofisial, Segunda (21/4/2025).
“Rota ida nee sei hetan servisu dala rua iha semana ho aviaun Boeing 737, oferese konfortu no efisiensia ba kliente hotu. Voo ida nee hatoo oportunidade viajen multi-sidade (multi-city) ba turista sira husi sidade oioin iha Indonezia hanesan Makassar, Bali, Surabaya, Jakarta, Batam, Pekanbaru, Medan, Padang, Banda Aceh no seluk tan,” nia hatutan.
Danang dehan proses reserva bilhete no check-in online bele halo ho fasilidade liu aplikasaun BookCabin. Aleinde nee, kliente sira hetan rekomendasaun atu sai membru CabinClub hodi bele goza oferta ekskluzivu no promosaun atrativu seluk.
Liu husi koneksaun ida nee, turista sira bele esplora Kuala Lumpur uluk, goza destinasaun turístiku no kulinaria Malazia nian, depois kontinua viajen ba Dili, Timor-Leste, destinasaun ida neebe riku iha kultura no natureza nia beleza.
“Batik Air optimista katak rota ida nee sei hasae asesibilidade ba Timor-Leste, oferese viajen direta neebe la komplikadu ho durasaun maizumenus oras haat ho minutu 15. Ida nee sei sai koneksaun neebe lalais, konfortavel, no efisiente entre Malazia no Timor-Leste,” Danang esplika.
“Servisu ida nee laos deit suporta setor turizmu, komersiu, no investimentu entre Malazia no Timor-Leste, maibe mos fo benefísiu boot ba povu Timor-Leste hodi asesu rejiaun rejonal ho luan liu. Batik Air orgulhu bele loke asesu neebe fasil liu no konfortavel ba destinasaun ida neebe atrativu liu iha Sudeste Azia,” nia dehan.
Corporate Communications Strategic of Batik Air nee dehan katak lansamentu rota ida nee sai parte husi esforsu Batik Air hodi halo konektividade rejional iha Sudeste Azia, no fortalese pozisaun Aeroportu Internasional Kuala Lumpur (KLIA T1) hanesan sentru tranzitu estratejiku.
Orariu voo Batik Air ba rota Kuala Lumpur-Dili sei hahu iha 6 Junhu 2025.
(dtc/ces)
