BAUKAU, STLTIMORLESTE.com – Joven rezistensia louva foinsae Baukau oan sira, tanba iha ona konsiensia kria pas no estabilidade iha Munisipiu Baukau.
Tuir joven rezistensia Adérito Domi katak, husi tempu naruk nia laran Munisipiu Baukau konhesidu ho naran muturabu, tanba haktuir husi istoria funu nian neebe uluk Joven Baukau oan sira barani fo aan ba risku hodi kontribui prosesu luta naruk Timor nian too hetan ukun aan.
Hafoin Timor ukun aan sosiedade nafatin prega liafuan muturabu ba Baukau oan sira, tanba asaun husi Baukau oan balu neebe t tenta halo problema ba malu hodi perturba ordem publiku, maibe iha tinan 2 ba kotuk Baukau oan halakon ona asaun muturabu, tanba laiha ona mosu problema boot entre Baukau oan hodi afeta ba seguransa.
“Dala barak ita nia ukun nain sira haree jovem sira mos haree tanba dala barak jovem sira halo problema iha Baukau nee mak bolu muturabu, maibe juventude Baukau espera katak, muturabu nee so uluk, agora nee muturau,” Jovem rezistensia Adérito Domi hateten ba STL iha Vila Nova Baukau, Segunda (23/02/2026).
Tuir jovem rezistensia nee katak, Baukau uluk muturabu (halo problema) agora Baukau oan transforma ona ba muturabu (laran diak), tanba esforsu husi Autoridade sira nian neebe halo sosializasaun ba jovem sira atu hakribi asaun problema sira.
Maibe esforsu sira nee, masimu liu iha Prezidente Autoridade Munisipiu Baukau, neebe sempre enkoraja jovem sira halakon muturabu, neebe rezultadu ohin loron hatudu, situasaun iha Baukau lao hakmatek, tanba hakarak Baukau oan moris ho hakmatek.
“Prezidente Autoridade Munisipiu nia la haree ba ras no kor, maibe ita haree ba nia vontade tomak neebe durante nia hakbesik aan ba komunidade juventude sira ida nee mak hodi hamenus tiha problema tinan 2 ou tinan 3 agora,” Domi argumentu.
Iha sorin seluk, Komadante Komando Polisia Munisipiu Baukau, Superintendente João Sancho Pires rekonhese, durante tinan 2 ba kotuk situasaun iha Munisipiu Baukau lao hakmatek, tanba jovem sira iha ona konsensia kontribui iha prosesu dezenvolvimentu Munisipal.
“Entermus situasaun iha Baukau ita lao diak entantu kazu kiik violensia domestika mak sae, maibe seluk seluk tanba kooperasaun ema hotu nian, balu mos komprende ona neebe situasaun lao diak la signifika PNTL mesak, maibe kontribusaun ema hotu hotu nian kria estabilidade, Seguransa iha ema hotu nia liman oinsa dezenvolvimentu lao prezisa iha seguransa neebe lao diak. Por volta tinan 2 nia laran Baukau la hanesan uluk, maibe tenta para atu kontinua nafatin hanesan nee diak liu para bele dezenvolve Baukau lao diak,” katak João Sancho Pires.
Komadante Komando Polisia Munisipiu Baukau nee husu Baukau oan hotu atu nafatin fo liman ba malu, kontribui ba pas no estabilidade, tanba asuntu seguransa iha ema hotu nia liman neebe prezisa apoiu malu, kria estabilidade ida diak ba Baukau sai diak liu tan.
(tom)
