BAUKAU, STLTIMORLESTE.com – Rezultadu prosesu avaliasaun kondisoens minimas poder lokal ba Munisipiu Baukau nian hatudu, sei iha frajilidade.
Prezidente Autoridade Munisipiu Baukau, Veneranda Lemos relata, iha tinan 2025 ekipa avaliador husi Nasional kobre ona Munisipiu sira iha Territoriu Nasional inklui kobre mos Munisipiu Baukau neebe halo ona avaliasaun ba servisu Administrasaun Munisipal nian no kondisoens seluk tan atu priense ba implementasaun politika Poder Lokal, neebe rezultadu hotu husi avaliasaun nian ekipa aprezenta ona ba Governu Sentral, anunsia ona Munisipiu 5 inkluindu Munisipiu Baukau hetan valor muito bom.
Nunee iha loron 28 Janeiru 2026 ekipa nasional fo sai hikas rezultadu final neebe deside husi Governu Sentral ba Autoridade Postu no Direitores Servisu Munisipal sira iha Munisipiu Baukau atu intende rezultadu sira no hadia konstrajimentu sira, tanba iha franjilidade.
“Prezisa tau atensaun masimu iha administrasaun, finansas, rekursus umanus, aprovisionamentu nomos servisu expediente sira seluk hanesan agrikultura neebe ita laiha armajen, aprezenta mos SMASEA tenke iha laboratorium” Veneranda hateten ba jornalista sira iha nia knaar fatin hafoin remata anunsiu rezultadu avaliasaun husi ekipa nasional ba Autoridade Suku, Postu no Diretores Servisu Munisipal sira iha salaun apuramentu Vila Nova Baukau, Kuarta (28/01/2026).
Nia sublina, frajilidade neebe hatudu iha rezultadu avaliasaun nian hanesan Diresaun Servisu Munisipal Agrikultura nian lo-loos laiha, tanba rai atu konstrui armajen ba Servisu Munisipal Agrikultura nian iha, maibe Diretor rasik la deklara prosesu refere iha faze avaliasaun neebe halao iha tinan kotuk.
Nunee mos kontribui seluk mak Servisu Munisipal Agua no Saneamentu seidauk iha laboratorium atu halo teste ba bee moos nian no pontuasaun seluk mak finansan no aprovisionamentu, tanba Munisipiu Baukau iha Portal Munisipal, maibe laiha publikasaun aprovisionamentu nian iha portal refere inklui dadus monografia no demografia.
“Ohin depois de divulgasaun avaliasaun kondisoens minimas nee ami hatene ami nia frajilidade sira ohin hau orienta kedas Diretores sira Sekretariu Munisipal para halo akompanhamentu ho diak hodi bele hadia daudauk ona, hau hanoin ohin divulgasaun nee franjilidade Baukau infrenta nee hau hanoin barak, maibe afinal iha parte tolu deit,” Veneranda akresenta
Eis deputada nee komenta, franjilidade hirak nee la konsidera problema boot hodi afeta ba implementasaun politika poder lokal iha Munisipiu Baukau, maibe konsidera nee problema kiik neebe Autoridade Munisipiu sei rezolve, tanba rezultadu avaliasaun ba kondisoens minimas neebe iha Munisipiu Baukau hetan valor 84.56%, nuee husu Autoridade sira nafatin servisu hamutuk hodi atinji mehi neebe iha.
Partisipasinte iha divulgasaun rezultadu avaliasaun kondisoens minimas, atual Xefe Suku Namanei, José Ximenes apresia ho Servisu Administrasaun Munisipal Baukau, tanba bele lori Munisipiu Baukau atinji valor 84.56% iha prosesu avaliasaun kondisoens minimas ba implementasaun politika poder lokal.
“Rezultadu ida nee laos rezultadu deit maibe ita tenke servisu hamutuk nafatin nunee ita nafatin iha valor neebe taka sai oin nee, buat sira neebe rezilente sira nee ita tenke hadia nunee ba oin ita hetan diak liu tan,” José katak.
Xefe Suku nee konsidera, Munisipiu Baukau hetan valor 84.56% la fasil maibe liu husi prosesu naruk, nunee husu prezisa servisu hamutuk nafatin hodi hadia liu tan servisu Munisipal nian, tanba avaliasaun kondisoens minimas ba poder lokal sei akontese tan iha faze tuir mai molok ba tinan implementasaun 2027.
(tom)
