BAUKAU, STLTIMORLESTE.com – Diresaun Servisu Ministeriu Agrikultura Munisipiu Baukau simu ona fini hamutuk tonelada 8 husi Governu, neebe sosa husi Ministeriu Agrikultura no Peskas iha tinan nee.
Responsavel Krop Agrikultura Munisipiu Baukau, Leonor Almeida de Araujo esplika, fini refere Ministeriu sosa husi kompanhia Anaprofiku ho variedade Sele neebe dadaun prepara ona no tuir planu, sei aloka ba kada Postu Administrativu iha Baukau atu distribui ba toos nain sira hodi kuda iha toos, tanba udan besik ona monu rai.
“Ba Munisipiu Baukau hamutuk 8 tonelada, agora daudaun iha edifisiu, neebe ami sei fahe ba Postu 6,” hateten Leonor Almeida de Araujo ba STL, iha Vila Nova, Kuarta (30/10/2024).
Nia sublina, husi fini batar refere sei aloka ba Postu Administrativu Baukau Vila hetan tonelada 1.800 kilograma, Kelikai tonelada 1.700, kg, Venilale tonelada 1.300 kg, enkuantu Postu 3 seluk hanesan Vemasi, Laga no Baguia kada Postu ida hetan tonelada 1.
Responsavel Krop nee rekonhese, fini refere seidauk sufisiente ba toos nain sira iha Munisipiu Baukau, tanba tuir estimasaun husi parte tekniku ba fini refere kada suku ida sei hetan deit fini kg 100 sei la responde ho numeru toos nain iha Munisipiu Baukau.
“Fini nee rasik lori ba too tiha iha Postu depois haree ema neebe, karik tinan hirak liu ba sira neebe simu ona, haree fo fali ba ema neebe seidauk simu,” Leonor akresenta
Nia argumenta, politika Governu liu husi Ministeriu apoiu fini batar ba toos nain sira hakarak hadia rendimentu produsaun hodi sustenta ekonomia familia, maibe ho rotativa, tanba toos nain hotu iha direitu atu hetan, laloos kada tinan mak apoiu deit toos neebe hetan hetan uluk ona apoiu.
Entretantu toos potensial neebe Diresaun Servisu Ministeriu Agrikultura Munisipiu Baukau rejistu husi Aldeia 281, Suku 59 hamutuk hektare 16.000.
(EST 2)
