DILI, STLTIMORLESTE.com – Governador Banco Central Timor Leste (BCTL), Helder Lopes hatete, sira sempre fo orientasaun ba banku sira atu atende kliente ho diak.
Governador BCTL, Helder Lopes hatoo kestaun nee ba jornalista sira bainhira remata hasoru malu ho Prezidente Republika Jose Ramos Horta iha palasiu Prezidensial Nikolao Lobato, Bairo Pite, Tersa (13/05/2025).
Governador BCTL dehan, sira sempre fo orientasaun ba iha banku sira atu atende kliente ho diak tanba konsidera kliente mak liurai.
“Husi BCTL ninian ami sempre fo orientasaun ba sira katak, ita nia kliente mak ita nia liurai, katak servi ita nia kliente ho didiak. Pur ezemplu nia iha banku A servi didiak nunee nia hela, se lae nia orsida halai fali ba banku B, tanba nee mak tenke servi ita nia kliente ho didiak, nee ami fo hanoin ba sira,” katak nia.
Governador dehan, agora orientasaun, depois polítika neebe sira impoin ba sira, nunee sira lao tuir mak tenke introdus servisu finanseiru dijital.
“Ami lansa kampanha ida bolu naran banku iha hau nia bolsu, ita boot sira uza mobile banking, ita boot sira bainhira kliente, banku sira nee hau labele temi sira nia naran, mas banku sira duke ita boot sira ba sira ninia fatin hodi transfere osan, dada osan, ita boot sira bele download sira nia mobile banking bele halo daudaun transferensia, bele asesu ona ba servisu baziku husi banku sira nian,” katak nia.
Nia hatete, ida nee tanba BCTL lansa programa ida dehan, banku iha hau nia bolsu, ida nee faz parte husi dijtalizasaun servisu finanseiru neebe sira husu ba banku hotu-hotu iha Timor atu lao tuir ida nee.
Aleinde nee nia hatutan, bainhira kliente foti osan iha ATM se la sala koa masimu liu mak 25 sentavus.
“Foti dala ida 25 sentavus, ida nee aplika tanba ita boot ba foti osan iha makina nee, ita boot tenke selu 25 sentavus, selu makina nee ninia service neebe fo mai ita. Hau aproveita oportunidade ida nee, dala ruma ita maluk sira neebe salariu kiik, osan oituan tau iha banku, depois salariu seidauk tama mais ba cek hela deit mak ninia balansu iha neeba, ba cek nee ATM koa tiha sentavus 25,” katak nia.
Neebe ba cek dala sanulu nee hira mak ba ona, cek dala ualu koa tiha, tanba nee mak haree bainhira ba cek ohin osan seidauk tama, loraik labele ba cek fali, tanba bainhira cek mak osan seidauk tama nee koa tiha 25 sentavus, tanba nee tenke selu ba cek iha neeba nee.
(eme)
