DILI, STLTIMORLESTE.com – Prizaun Gleno laos deit iha kondenadu sira neebe ho idade boot mak hela iha fatin neeba, maibe bebe ida mos hela iha fatin neeba hodi hamaluk nia mama.
Tuir Diretor Prizaun Gleno, Cristiano Salsinha katak, Prizaun Gleno oras nee daudaun iha prezu hamutuk 101, feto nain 22 no restu husi nee mane hotu inklui bebe kiik ida no inan gravida ida.
“Prizaun Gleno iha prezu hamutuk 101, ho bebe ida no bebe nee nia inan tama mai lori kedan husi liur mak mai, bebe ho fulan ida, no iha loron Kuarta (25/12/2024) bebe feto oan nee halo tinan ida ona iha Prizaun Gleno,” dehan Diretor Prizaun ba STL liu husi telefone, Kinta (26/12/2024).
Nia hatutan, kondenadu feto ida neebe tama iha Prizaun hamutuk ho nia oan, foin tama iha tinan 2024 nee, no seidauk prienxe um tersu ka metade da pena, tanba nee seidauk halo pedidu hodi husu indultu, kuandu kompleta ona metade de pena sei halo pedidu.
Esplika tan, iha mos prezu feto ida neebe oras nee daudaun gravida, tama iha prizaun gravida ho fulan tolu no agora halo fulan hitu ona.
Nia sublina, maske iha bebe no inan gravida, iha nafatin taratamentu saude ba sira, tanba konsidera sira nia saude importante tebes, bainhira ho situasaun gravida no bebe kiik.
Reforsa tan, Prizaun Gleno oras nee daudaun iha Guarda Prizional hamutuk 36, iha mos transporte rua hodi tula kondenadu sira ba tuir julgamentu.
Hatan kona-ba Estatutu Guarda Prizional, nia parte dehan, husu atu iha tinan 2025 nee bele aselera, atu fo motivasaun ba Guarda sira hodi servisu ho responsabilidade.
Tanba, agora daudaun halo tan rekrutamentu ba Guarda Prizional, maibe Guarda neebe servisu iha uluk mai too agora seidauk iha Estatutu atu regula sira.
Iha fatin ketak, Komunidade Suku Komoro, Tomas dos Santos dehan, presiza kria kondisaun diak ba dadur sira, liu-liu ba inan feto sira.
“presiza kria kondisaun diak ba sira, tanba dala ruma saida mak sira halo nee ho emosaun, no arepende buat hirak nee akontese liu ona,” dehan nia.
Hatutan tan, tama iha Prizaun laos signifika sira hetan kastigu, maibe oinsa atu muda sira nia hahalok hodi sai iha liur labele halo tan.
(ter)
