DILI, STLTIMORLESTE.com – Prizaun Gleno oras nee daudaun iha dadur hamutuk nain 101, iha mos bebe nain rua (2) mak hela hamutuk ho sira nia mama iha prizaun laran.
Tuir Diretor Prizaun Gleno, Cristianho Salsinha katak, prizaun Gleno iha dadur hamutuk 101, husi numeru nee iha prizaun preventiva no mos prizaun kondenadu.
“Iha prezu hamutuk 101 husi numeru nee iha prizaun preventiva nain haat no restu prizaun kondenadu, no iha feto hamutuk nain 21 no restu husi nee mesak mane deit,” dehan Diretor Prizaun Gleno ba STL liu husi telefone, Tersa (17/06/2025).
Nia hatutan, iha mos labarik kiik nain rua mak hela hamutuk ho sira nia inan iha prizaun, ida halo tinan ida ona no ida foin halo fulan haat, maibe atendimentu ba kiik oan nain rua lao normal. Oras nee daudaun sira sei konsumu susu been inan nian, se karik sira la konsumu ona mak sei buka meius hodi fasilita hahan neebe sira bele han no hemu.
Sublina tan, dadur sira iha prizaun han tuir menu neebe iha, no loron ida sira han dala tolu, hanesan iha dader matabisu, han meudia nian no han kalan nian.
Reforsa, foin lalais nee iha Prizaun Gleno nian iha dadur feto nain haat mak hetan ona indultu husi Prezidente Republika, tanba nee oras nee daudaun iha deit dadur feto 21 mak sei iha Prizaun Gleno.
Tuir Diretor nee katak, oras nee daudaun iha Guarda Prizional hamutuk 60 mak halao servisu atu tau matan ba dadur sira, tanba nee sira la iha difikuldade ona. Maibe husu deit ba iha parte relevante atu hare deit kona-ba sira nia estatutu Guarda Prizional nian, tanba sira servisu kleur ona maibe seidauk iha estatutu ida regula sira.
Iha fatin ketak, Akademiku Universidade Nasional Timor Lorosae (UNTL), Pedro Martins dehan, prizaun laos fatin atu kondena ema, maibe fatin atu halo mudansa ba ema nia hahalok.
“Fatin neebe atu transforma ema hodi sai iha liur bele halo mudansa ba nia hahalok, tanba nee presiza kria atividade barak iha Prizaun,” dehan nia.
Hatutan tan, tau mos atensaun ba kiik oan sira neebe iha prizaun, tanba sira inosente presiza kria kondisaun diak ba sira atu sira mos bele moris ho livre hanesan ho kiik oan sira neebe iha liur.
Tuir observasaun STL nian, antes nee iha prezuneira feto ida husi Prizaun Gleno mai tuir julgamentu iha Tribunal Dili, prezuneira nee mai lori ho nia oan kiik oan ida. No Krimi nebee nia komete omisidiu.
(ter)
