DILI, STLTIMORLESTE.com – Prizaun Gleno oras nee daudaun iha dadur hamutuk nain 106 no bebe nain 3 mos iha Prizaun hamutuk ho sira nia inan.
Tuir Diretor Prizaun Gleno, Cristiano Salsinha katak, prizaun Gleno iha dadur hamutuk nain 106.
“Prezu hamutuk 106 husi numeru neebe iha feto hamutuk 20, iha labarik bebe nain tolu, ida inan tama ba lori kedan, maibe rua inan tama ba iha Prizaun ho kondisaun gravida hela tanba nee sira nain rua moris iha prizaun, “dehan Cristiano ba jornalista STL liu husi telefone, Tersa (9/07/2025).
Nia hatutan, bebe nain tolu nee feto hotu, ida halo fulan neen ida halo semana rua no ida halo tinan rua ona. Tratamentu ba labarik sira lao diak, tanba iha kordenasaun ho Ministeriu da Saude no Ministeriu da Justisa, no Madre sira tanba nee iha fasilidade ba inan no oan sira.
Maibe bebe nain tolu nia inan nee, iha inan ida tama ba iha Prizaun Preventiva, nain rua ba iha prizaun kondenadu, neebe agora kumpri hela sira nia sentensa.
Nia hatutan, atividade neebe halao iha prizaun Gleno ba mane sira maka pedreira, karpinteiru, no ba feto sira konaba kulinaria.
No oras nee dadaun iha dadur mane nain rua maka tama iha Prizaun sofre hela moras TBC, tanba nee tau sira ketak tuir regra neebe iha, hodi kontinua hetan tratamentu husi doutor sira.
Nunee mos kona ba hahan kompania sira neebe fornese hahan kontinua fornese hahan matak, depois maka dadur sira neebe atu hetan liberdade kondisional tein atu dadur seluk bele han. Hatan konaba dadur juvenil, tuir nia oras nee dadaun Prizaun Gleno iha dadur Juvenil nain ida.
Tuir dadus neebe iha, guarda Prizional oras nee dadaun iha Prizaun Gleno guarda Istruidu hamutuk 23, guarda prizional hamutuk 37.
Iha fatin ketak, Akademiku Universidade Nasional Timor Lorosae (UNTL), Sebastião Dos Santos dehan, presiza kria kondisaun diak ba bebe sira neebe hela hamutuk ho inan iha Prizaun.
“Hau hanoin presija kria kondisaun ba kiik oan sira nee, maske hamutuk ho inan sira iha Prizaun, maibe tau kondisaun diak ba sira,” dehan nia.
(ter)
