DILI, STLTIMORLESTE.com – Permakuktura Timor Leste (PERMATIL) nia observasaun ba situasaun iha Timor Leste (TL) haree katak, bee mak sai sobrevive iha sosiedade, tanba bee mak sai alternativu importante ba ema hotu nia moris.
Dehan Programa Manager husi PERMATIL, Adelino Cabral liu husi nia diskursu, iha Farol, Dili, Sesta (15/11/2024).
“Ita haree katak bee mak sai pontu importante no sai sobrevive ba ema hotu, tanba nee ema hotu tenke kuidadu bee, utiliza ba buat neebe bele fo benefisiu, no kuidadu mos ambiete neebe sei nakonu ho ai-horis sira, tanba ai-hun sira nee mak hakiak bee,” dehan Adelino.
Bee tuir Adelino mak moris, laiha bee laiha moris, hanesan produtu seluk bele taka ho rekursu seluk, maibe laiha bee laiha rekursu seluk mak atu rezolve, tanba nee bee sai nesesidade diaria ba ema hotu iha sosiedade.
Tanba husi bee mak fo saude no raan ba ema hotu, bee nee mai husi ai-mahon sira, neebe sei matak nafatin, maibe kuandu estraga ona ambiete, hanesan rai, entaun bee sei menus ba ema hotu atu utiliza bee.
Bee atu moris presiza kuidadu liu husi kuda ai-horis barak, halo debu neebe diak, iha foho leten sira, nunee bele haburas liu tan volume bee ba iha kraik, hodi bee matan sira iha Kraik kontinua barak atu fo nesesidade diak ba komunidade iha sosiedade.
Aleinde nee Diretor Asosiasaun HAK hateten, bee nee direitu umanu, tanba nee presiza duni halo melhoramentu neebe diak ba jestaun bee iha Timor Leste, tanba bee mak fo protesaun saneamentu no inimigu ba ema hotu atu moris ho kondisaun saudavel.
Tanba nee sistema bee moos nee importante tebes ba ema hotu, no sai nuudar direitu ba moris, nunee hanesan parte relevante sira tenke fo hanoin oinsa bele harii jestaun neebe diak, dezenvolve setor bee nee sai sufisiente ba ema hotu atu konsumu ho diak.
Entretantu Durante nee Country Director Water Aid, Justino da Silva hatete, bee nee nuudar baze fundamental ba ema hotu, oinsa bele utiliza bee ho diak, hodi kondisional ba nesesidade moris, tanba nee presiza duni atu kuidadu sistema bee iha TL.
Bee nee sai nesesidade diariu ba ema hotu nia saude, liu-liu problema malnutrisaun sira, hanesan iha Timor Leste kuaze 47.1%, tanba impaktu mos konsumu bee neebe la saudavel, entaun presiza duni atu esforsu hamutuk halo planu neebe diak, atu dezenvolve diak liu tan ba bee iha rai laran.
(EST 1)
