BAUKAU, STLTIMORLESTE.com – Projetu kanalizasaun bee moos neebe Bee Timor-Leste (BTL) kanaliza ba komunidade Suku Vemasi, Postu Administrativu Vemasi, Munisipiu Baukau la sufisiente, tanba komunidade balun la asesu bee moos.
Administradora Postu Vemasi, Elda Maria Viegas de Sousa Freitas esplika, bee moos importante ba komunidade sira hotu inklui komunidade iha Vemasi, tanba nuudar nesesidade primeiru, maibe dadaun komunidade iha nivel Suku hitu (7) hanesan Suku Kaikua, Loilubu, Ossoala, Ostiku, Uaigae, Uatilari no Vemasi kuaze maioria asesu ona, tanba liu husi kanalizasaun Programa Nasional Dezenvolvimentu Suku (PNDS) no Bee Timor-Leste (BTL).
“Iha dezafiu balun neebe mak Vemasi hasoru mak BTL nee sei benefisia ba komunidade balun deit, komunidade barak mak seidauk benefisia hotu ba BTL nee, tanba antes sira harii tanki komunidade hotu hotu servisu, maibe realidade sira la konsumu BTL nee rasik,” hateten Administradora Postu Vemasi ba STL iha Vemasi, Kuarta (30/04/2025).
Elda Maria Viegas de Sousa Freitas katak, liu liu kanalizasaun bee moos husi BTL neebe kanaliza ba komunidade Suku Vemasi, liu liu komunidade balun la benefisiu, tanba kanalizasaun la too komunidade sira nia rezidensia.
Administradora Postu nee preokupa, Suku Vemasi nuudar Suku urbana iha Postu Vemasi, maibe kanalizasaun la sufisiente, tanba komunidade balun kontinua halerik ba bee moos.
“BTL presiza planu oinsa para kobre Suku Vemasi laran, tanba nee Suku urbana, se BTL diak duni ba Suku Vemasi ita sei servisu hamutuk ho sira halo koordenasaun,” hateten Elda Maria Viegas de Sousa Freitas
Too notisia nee publika STL seidauk halo komfirmasaun ho BTL.ep Munisipiu Baukau.
(tom)
