DILI, STLTIMORLESTE.com – Ministru Negosiu Estranjeiru no Kooperasaun (MNEK), Bendito Freitas hatete, nasaun barak mak apoiu Timor Leste (TL) hodi adere ba ASEAN iha fulan Outbubru tinan nee.
Ministru Negosiu Estranjeiru no Kooperasaun, Bendito Freitas hatoo kestaun nee ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Tersa (22/07/2025).
“Atu informa ba ita boot sira katak, iha enkontru Ministru Negosiu Estranjeiru ASEAN nia iha Kuala Lumpur nee estadu membru ASEAN hotu-hotu deklara atu fo apoiu masimu Timor Leste depois de adezaun Timor Leste,” katak Ministru Negosiu Estranjeiru.
Ministru hatete, Singapura partikularmente nia sei fo apoiu masimu ba Timor Leste atu adere ba ASEAN, apoiu ba rekursu umanu, preparasaun ba area hotu-hotu neebe sei ligadu ba Timor Leste.
Nunee mos estadu sira seluk mos prontu inklui mos parseiru dialogu hanesan Japaun, Australia, Nova Zelandia, iha reuniaun enkuantu Ajer Nova Zelandia no seluk tan fo prioridade apoiu ba Timor Leste preparasaun post adezaun katak depois adezaun ita partisipa ativamente ona iha enkontru no konferensia, lidera, ita presiza duni kuadru nee entre linas ministeriu hotu-hotu neebe hau hanoin ita prepara didiak bainhira ita tama ita hatuur ita nia responsablidade partisipasaun ho kualidade ho kompetensia tomak atu bele mantein nafatin Timor Leste nia imajen iha politika rejional no internasional,” katak Ministru.
Aleinde nee Mianmar rasik deklara katak sei la fo apoiu ba TL? hatan ba kestaun nee Ministru hatete ida nee lafo impkatu.
“Nee la fo impkatu, hau rasik koalia ho sira no ita nia prezidente no Primeiru Ministru mos hatete ona laiha impkatu tanba deklarasaun final iha simeira nee final ona,” hakotu nia.
(eme)
