DILI, STLTIMORLESTE.com – Benefisiáriu bolsa kandidatu profesores faze primeiru no segundu hamutuk 400 sei tuir formasaun iha Rairobo, Atabae.
“Ita halo kooperasaun diak ho Marista Baukau sei fo formasaun ba profesores bolsa kandidatu faze primeiru no segundu. Faze primeiru sei hahu iha loron 9 too 21 Dezembru nia laran, total ema neebe partisipa iha formasaun ida nee ema 400, neebe sei fahe ba grupu rua. Grupu ida sei realiza iha loron 9 Dezembru, kompostu husi Munisipiu Bobonaro, Dili no Lautem, ema neebe sei partisipa nee 200 ital, neebe mak sei tuir formasaun iha sentru formasaun polisia akademik iha Rairobo,” afirma Prezidente Infordepe, Domingos Martins ba jornalista sira iha salaun Ian Martin Balide, Kinta nee (05/12/2024).
Domingos dehan, materia neebe mak sira sei hetan iha formasaun nee kona-ba pedalojia, metodolojia ensinu, fraternidade umanu ou etika professional, kurrikulu no lejizlasaun nee foka liu ba lei funsaun publika nomos lei baze de edukasaun.
Iha fatin hanesan, Ministru Edukasaun Interinu (ME), Domingos Lopes Lemos dehan, formasaun ba profesores sira nee sei halao iha Atabae, no fo formasaun ba profesores neebe koloka ona ba eskola sira.
Formasaun ba profesores sira nee iha Rairobo Atabae, liu-liu profesores foun neebe mak halo ona kolokasaun ba eskola sira, maibe atu hetan informasaun detalhu diak liu halo intervista ho prezidente Infordepe,” katak nia.
(jac)
