BAUKAU, STLTIMORLESTE.com – Veteranu Fernando Beredu’u Gusmão apresia Primeiru Ministru (PM), Kay Rala Xanana Gusmão, tanba tun direita hodi taka jogu online hanesan Lotaria Grand Dragon.
Veteranu tinan 24 atual Prezidente Konselhu Munisipal Kombatentes Libertasaun Nasional (KMKLN) Baukau, Fernando Beredu’u Gusmão hateten, Primeiru Ministru Kay Rala Xanana Gusmão nuudar aman ba nasaun neebe nafatin iha fuan tun direita ba terenu,hodi taka jogu online hanesan Lotaria no Grand Dragon, tanba jogu Online 2 nee ilegal.
“Hau hanoin nee diak, jogu balu legal selu taxa balu ilegal loke iha kotu kotuk deit ho ida nee mak Primeiru Ministru taka hau hanoin nee loos hanesan nee duni,” Beredu’u hateten ba STL, iha nia knaar fatin Vila Antiga, Baukau, Kuarta (10/12/2025).
Nia komenta, jogu Online neebe estabelese iha Timor-Leste balu legal no balu ilegal tanba la rejistu iha parte kompetente, nunee atuasaun Primeiru Ministru nian ba asuntu taka jogu online hanesan Lotaria no Grand Dragon nee diak, tanba jogu Online 2 nee la kontribui reseitas ba kofre estadu.
Alenide la kontribui reseitas ba kofre estadu jogu Online sira mos iha tendensia makaas bele aumenta numeru populasaun kiak iha Timor-Leste, tanba povu maioria sei moris iha linha pobreza, maibe nasaun hahu domina ho jogu osan, tanba nee Primeiru Ministru foti dezisaun taka jogu nee.
“Jogu nee mos halo rugi hotu povu sira nee ba taka osan nee jogu nia nain mak manan povu sira mak lakon fali, ida nee mak katuas hanoin la diak taka tiha, tanba halo kiak povu,” Beredu’u argumentu.
Veteranu nee husu ba Governu no parte seguransa sira iha Timor-Leste atu kontinua kontrola no atensaun ba jogu sira liu liu jogu Online iha Timor-Leste, neebe karik balu la rejistu iha parte kompetente tenke taka, tanba bainhira la kontrola jogu sira povu kontinua sai vitima ba jogu sira.
Nia mos husu ba Governu atu tau atesaun mos ba iha parte seguransa liu liu Polisia sira, tanba posibilidade autor ba jogu Online sira bele lansa estratejia liu husi Polisia bele loke jogu online iha Timor-Leste.
“Hau husu estadu, labele se mak loke fahe malu ho polisia sira, orsida sira loke nee kuandu osan tama ona fahe malu sira nain hira nee mak simu osan kontente, povu kiak nafatin nee mak halo problema ba estadu ho Governu, nee mak hau husu tenke kontrola didiak,” Beredu’u sujere.
Enkuantu tuir Xefe Suku Fatudere, Jeronimo Soares Alves katak, jogu Knline sira neebe eziste iha Timor-Leste presiza duni taka, tanba nia implikasaun la diak ba Timor oan sira.
“Jogu Online nia implika la diak, tanba ita nia oan sira idade kiik mos partisipa iha neeba la nesesariu ba komunidade sira nee diak liu taka, mais ida neebe mak iha vantajen ba ita nia estadu nee bele, mais ida ilegal diak liu taka,” Jeronimo katak.
Nia mos komenta, ezistensia jogu online neebe iha Timor ho ilegal tenke taka, tanba futuru bele hamosu krime organizadu, nunee presiza kontrola no taka.
“La kontrola liu husi jogu Online sira nee bele hamosu krime organizadu liu husi jogu nian, neebe taka nee diak liu,” bia argumentu.
Lideransa Komunitaria Fatudere apresia inisiativa Primeiru Ministru, Kay Rala Xanana Gusmão neebe nuudar Aman ba Nasaun Timor-Leste nafatin iha vontade, hodi atual problema neebe Timor-Leste infrenta no husu nafatin lalika fo lisensa ba jogu Online sira hodi eziste iha Timor Leste.
Jornalista: Tomas Reis
Editora: Carme Ximenes
