BAUKAU, STLTIMORLESTE.com – Prezidente Konselhu Munisipal Kombatentes Libertasaun Nasional Munisipiu Baukau, Fernando Beredu’u Gusmão sujere, Ministra Saude, Élia Amaral halo reflesaun iha selebrasaun loron Restaurasaun Independensia ba dala 23.
Tuir Prezidente Konselhu Munisipal Kombatentes Libertasaun Nasional Munisipiu Baukau, Fernando Beredu’u Gusmão nia obrservasaun durante ukun aan too iha faze Restaurasaun Independensia ba dala 23, Timor Leste enfrenta problema makaas liu iha setor saude, tanba taxa mortalidade sae makaas.
“Saude nee problema iha Timor laran tomak, aimoruk falta ema mate naba naba, Ministra Saude hanoin halo oinsa mak diak, pelu menus diminiu oituan” hateten Beredu’u ba jornalista sira iha Vila Antiga, Baukau Kinta (15/05/2025).
Nia haktuir, tuir obeservasaun Konselhu Munisipal sira nian ba setor saude, sidadaun sira neebe mate iha fasilidade saude, deskonfia stok ai-moruk ba atendimentu laiha.
Aleinde mos kondisaun seluk neebe setor saude enfrenta liu-liu fasilidade servisu, hanesan kareta multi funsaun ba sentru saude Venilale avaria difikulta komunidade sira.
Beredu’u katak, difikuldade neebe daudaun setor saude enfrenta sai referensia ba Ministeriu Saude atu tetu no fo solusaun.
“Ami koalia hanesan nee laos kritika Governu ida nee, maibe aimoruk mak laiha duni ema mate, nee aimoruk mak laiha ga destinu mak mate, se destinu mak mate laiha problema, maibe aimoruk mak laiha, saude responsabilidade,” hateten Beredu’u.
Prezidente Konselhu Munisipal Kombatentes Libertasaun Nasional Munisipiu Baukau nee sujere, iha tinan Restaurasaun Independensia Timor Leste ba dala 23, prezisa Ministeriu Saude halo reflesaun liu husi analiza, estuda hodi kombate risku iha setor saude.
(tom)
