DILI, STLTIMORLESTE.com – Bis husi Dili ba Lospalos neebe tula pasajeirus tenke tuir regras, atu nunee labele hetan asidente, tanba sira atu ba hamutuk ho familia hodi selebra loron matebian ho kondisaun neebe diak.
“Bis husi Dili ba Lospalos tenke tuir regras, labele tula pasajeirus liu kadeira, labele tula ema ho kondisaun lanu, nomos halai ho kuidadu, labele halai kalan, tanba ita nia Polisia Tranzitu sira avizu ona,” hatete Kondutor Bis Lospalos, Julio Freitas Belo ba STL iha Terminal Bekora, Díli, Sesta (1/11/2024).
Nia dehan, Bis husi Díli ba Lospalos viajen kalan laos loron, tanba nee husi tuku 11:00 buka ona pasajeirus too 12:00 sai ona husi Díli ba Lospalos, too tuku 05:00 lokraik too ona Lospalos, maibe agora pasajeirus barak mak atu viajen ba foho.
“Ita haree pasajeirus barak mak buka Bis, tanba loron nee loron importante, sira hakarak ba selebra loron matebian hamutuk ho familia, tanba nee ami mos tenke tuir regas neebe PNTL fo ami,” nia esplika.
Iha fatin hanesan, Kondutor Bis Baukau, Edoardo da Silva Belo deklara, Bis Baukau husi Díli Ba Baukau tula pasajeirus labele liu bis nia kondisaun, antes halao viajen PNTL ho DNTT avizu ona katak, tula pasajeirus tuir regras neebe PNTL fo sai ona.
“Maske loron matebian sidadaun barak mak hakarak viajen ba foho hodi selebra loron matebian, tanba nee ita lao ho kuidadu, ami husi Díli ba Baukau nee oras tolu too ona Baukau ,” nia informa.
Observasaun STL nia iha terenu, sidadaun hotu-hotu hahu husi loron 30 too loron 1 fulan Novembru, sidadaun sira halo viajen ba idak-idak nia knua, hodi selebra loron matebian hamutuk ho familia, sira hadau malu Bis Baukau, Vikeke nomos Lospalos, no sidadaun barak mak viajen uza transporte motor ba idak-idak nia munisipiu.
(jen)
