DILI, STLTIMORLESTE.com – Polisia Nasional Timor Leste (PNTL) tenke halao cek point, tanba bis diresaun Díli ba Lospalos tula pasajeiru liu kapasidade iha loron boot Natal no tinan foun.
“Tinan foun nee ita haree bis husi Dili ba Lospalos tula pasajeiru liu kapasidade, tanba nee ita husu PNTL tenke cek point atu nunee prevene asidente,” hatete pasajeiru Paulino da Costa ba STL iha Hera, Segunda (30/12/2024).
Nia dehan, PNTL tenke kontrola bis sira husi Dili ba Lospalos no bis husi Dili ba Baukau, tanba bis sira nee sempre tula pasajeiru barak liu.
“Kadeira sira nee sempre nakonu, maibe pasajeiru barak mak tara aan, no balun tur iha leten no balun tara aan iha karreta nia kotuk, tanba nee ita atu prevene asidente tenke tuir regras neebe DNTT no PNTL avizu ona,” nia esplika.
Iha fatin ketak, Kondotor Bis Lospalos, Alarico Mouzinho de Jesus informa, pasajeiru sira nee sempre fo avizu para tur hotu iha kadeira nee, komu kadeira nakonu entaun balun hamriik deit, maibe wainhira liu Bekora sira rasik ba buka hodi tur iha leten no tara aan iha karreta kotuk.
“Ita sai husi Dili, ita sempre fo hatene hotu-hotu tur iha karreta laran, maibe ita sei iha Bekora nee sira tauk PNTL entaun sira tur hotu iha laran, wanhira liu ona Bekora sira komesa sai ba tara aan no balun tur iha karreta leten, ita koalia maibe sira la rona ita no ita atu hatun iha dalan mos ladun diak, entaun hakarak ka lakohi tenke tula ona,” nia afirma.
(jen)
