BAUKAU, STLTIMORLESTE.com – Relasiona ho negosiante neebe hetan violentu husi Guarda Munisipal Baukau, Bispu Dioseze Baukau, Dom Leandro Maria Alves husu Autoridade Munisipiu Baukau trata negosiante sira ho umanidade.
“Torturasaun husi Guarda sira nee hau seidauk hatene buat ida, neebe hau labele komenta ba ida nee, maibe atu dehan deit importante liu mak buat hotu halo espiritu umanidade, halo buat hotu ho domin, koalia ba malu ho razaun neebe aseitavel,” hateten Dom Leandro ba STL iha Vila Antiga, Kuarta (15/01/2025).
Bispu Dioseze Baukau nee hatete, mezmu mudansa merkadu iha Munisipiu Baukau akontese kleur ona, maibe Guarda Munisipal sira halo asaun hasoru negosiante sira too balu hetan kanek, tanba baku nee la prezisa, prezisa mak ho espiritu umanidade neebe iha domin.
Tanba nee presiza kria dialogu, nunee hetan aseitavel husi parte hotu, iha implementasaun programa bele parte hotu iha konsiensia kontribui, tanba nee planu Governu.
“Planu Governu nian mos ita haree oinsa mak komunika diak ho maluk sira neebe ita hatene katak, ida nee sira nia vida mai faan sasan, buat neebe sira hetan husi ida nee mak sustenta sira nia moris,” Bispu Dioseze Baukau nee akresenta.
Dom Leandro sente triste no lamenta ba atuasaun husi Guarda Munisipal, tanba negosiante balu hetan kanek, nunee husu Autoridade Munisipal Baukau atu kria mekanizmu labele kria violensia.
Entretantu akontesimentu Guarda Munisipal Baukau baku negosiante sira iha eis merkadu area rotunda Vila Nova, iha loron 13 Janeiru, parte loraik, iha neebe negosiante sira faan hela sasan iha area refere.
(EST 2)
