BAUKAU, STLTIMORLESTE.com – Bispu Dioseze Baukau, Dom Leandro Maria Alves sente triste ho asaun husi ekipa Sekretariu Estadu Asuntu Toponomia Organizasaun Urbana (SEATOU), neebe halo iha kapital Dili foin lalais nee.
Deklarasaun nee Bispu Dioseze Baukau hatoo ba jornalista sira hafoin inaugura kongregasaun eskola Sint Marie Buruma, Sesta nee (25/10/2024).
“Ita haree sente triste duni, buat ida neebe halo ita nia laran moras. Hau hanoin Governu sira prepara fatin neebe mak diak hodi lori ita nia maluk sira nee ba fatin neebe mak prepara,” hateten Dom Leandro.
Tuir Bispu Dioseze Baukau nee katak, fatin ba vendedores sira neebe Governu antes nee prepara too ohin loron iha kapital Dili seidauk sufisiente, tanba volume vendedores barak neebe la konsege akuluma iha fatin sira.
Nunee hanesan Autoridade tenke prepara uluk kondisaun fatin ba vendedores nomos dialogu entre Autoridade ho vendedores molok muda husi fatin tuan ba fatin foun, tanba vendedores faan produtu lokal neebe buka moris iha dalan ninin kapital Dili, nee mesak Timoroan deit.
“Atu labele akontese buat konfrontu entre ita nia populasaun ho ita nia governante nee ladun diak, maibe buka oinsa mak lori ita nia maluk sira nee ho dignu ba fatin neebe dignu,” Dom Leandro akresenta.
Bispu Dioseze Baukau nee rekomenda ba Governu atu kria kondisaun merkadu nee dignu ba vendedores sira hafoin halo kolokasaun, tanba fatin barak neebe antes Governu prepara ona iha Dili kondisaun balun seidauk adekuadu, liu-liu kolokasaun vendedores nian atu kompradores sira asesu produtu atu sosa.
(EST 2)
