DILI, STLTIMORLESTE.com – Banku Nasional Komersiu Timor Leste (BNCTL) ohin hahu halo pagamentu ba idozus no Ema ho Defisiensia (EhD) ba segundu faze iha Suku Kolmera, neebe halao iha Suku Motael.
Xefi Suku Kolmera, Moises de Araujo Barros hatete, ohin benefisiariu Kolmera halo pagamentu ba segundu faze, neebe halao iha Suku Motael, tanba suku rua halo pagamentu hamutuk, tanba benefisariu Kolmera ema oituan nunee hamutuk ho benefisiariu Motael.
“Ami nia benefisiariu total hamutuk ema nain 60, ohin halo pagamentu iha Suku Motael,” hatete Xefi Suku Kolmera, Moises de Araujo Barros ba jornalista STL iha fatin pagamentu Suku Motael, Tersa nee (1/07/2025).
Nia dehan, husi total benefisiariu nain 60, maibe nain 35 simu direita iha Suku, nain 25 foti husi ATM, tanba nee husi total benefisariu nain 60 kompostu husi aldeia rua mak hanesan Rain Nain no Manu Fuik.
“Nuudar Autoridade Lokal sente kontente, tanba Governu liu husi Ministeriu Solidariedade Sosial no Inkluzaun (MSSI) apoiu ona idozus no EhD bele hakmaan sira nian nesidade loron-loron nian,” hatete Moises.
Tanba nee agradese ba MSSI neebe fo tulun ona idozus no EhD hodi responde netik sira nia nesesidade, tanba sira ferik katuas ona.
Maibe ladun diak ba idozus neebe asesu ona ba ATM, tanba ferik katuas sira nee uza ATM la hatene entaun sira fo fiar ba oan ka be oan mak foti osan, ba foti manipula ferik katuas sira nia osan neebe foti nee, nee ladun diak, tanba iha balun akontese hanesan nee, nunee husu ba benefisiariu sira simu osan ba foti direita iha suku atu nunee nain simu rasik, nunee koalia ba banku taka ATM no nain simu rasik iha suku refere.
Iha fatin hanesan, idozus Martinho da Costa hatete, nuudar idozus agradese ba Governu liu husi MSSI neebe fo ajuda ba idozus sira fulan tolu-tolu, oinsa bele ajuda ami kbiit laek nee, tanba idade ona presiza governu fo tulun, atu nunee bele sustenta moris loron-loron nian.
“Hau kontente ohin simu osan neebe MSSI oferese ba hau, atu nunee bele uza ba nesidade presiza iha moris,” dehan nia.
(joa)
